Ukrainaga 2022-yil mart oyida bo‘lib o‘tgan muzokaralar doirasida tinchlik o‘rnatish evaziga NATO a’zoligidan voz kechish taklif qilingani haqida xabarlar tarqaldi. Ukraina prezidenti ofisi rahbari maslahatchisi Mixail Podolyak o‘shanda urushni tugatishni Ukrainaning harbiy betarafligiga almashtirish uchun real imkoniyat bo‘lmaganini aytdi. Bu haqda UNIAN xabar berdi.
Ma’lum qilinishicha, bunday masalani har ikki tomon jiddiy ko‘rmagan. Mixail Podolyak Ukraina delegatsiyasi tarkibida o‘sha muzokalarda qatnashgan. U potensial tinchlik shartnomasi loyihasida Ukrainaning NATOga a’zo bo‘lish istagidan voz kechish evaziga Rossiya qo‘shinlarini demarkatsiya chizig‘iga olib chiqishni nazarda tutuvchi band umuman bo‘lmaganini aytdi.
Podolyak muzokaralarda Ukraina delegatsiyasining vazifasi Rossiya bilan tinchlik shartnomasini imzolash emas, balki Rossiya keng ko‘lamli bosqinchilik bilan qanday siyosiy maqsadlarni ko‘zlayotgani — Kreml qanchalik uzoqqa borishga tayyorligini tushunishga harakat qilish bo‘lganini aytdi. Ukraina delegatsiyasi bu vazifani bajargani ma’lum qilindi.
“Ushbu muzokaralarda Rossiya haqiqatan ham Ukraina davlatchiligiga nisbatan imkon qadar shafqatsizlarcha munosabatda bo‘lishni, ya’ni diplomatik bosim qo‘shgan holda harbiy yo‘l bilan bu davlatchilikni butunlay yo‘q qilishni xohlayotgani aniq bo‘ldi”, — deydi Podolyak.
Shuningdek, u Ukraina delegatsiyasining muzokaralardagi ikkinchi vazifasi “ichki guruhlash”ni amalga oshirish uchun harbiy harakatlarda “operativ pauza” olish istagi bo‘lganini bildirdi.
O‘z navbatida, Rossiya muzokaralarda Ukrainani qurolsizlantirishni, harbiy bloklarda ishtirok etishdan bosh tortishni va aslida Ukraina suverenitetini yo‘qotishni talab qilgan. Podolyakning ta’kidlashicha, Ukrainadan hech qanday imtiyozlarni urushni tugatish va Rossiya qo‘shinlarini to‘liq olib chiqish uchun almashtirish imkoniyati bo‘lmagan.
Bosqinning boshida Rossiya—Ukraina muzokaralari
Birinchi Rossiya—Ukraina muzokaralari 28-fevralda Belarusning Gomel shahrida, 3 va 7-mart kunlari Brestda bo‘lib o‘tdi. Muzokaralarning keyingi bosqichi 29-mart kuni Istanbulda bo‘lib o‘tgan va u oxirgisi edi.
Ko‘p o‘tmay, rus qo‘shinlari Ukraina shimolidan chekinishga majbur bo‘ldi va butun dunyo Bucha va boshqa bosib olingan shaharlarda ruslarning ommaviy vahshiyliklari tasviriga duch keldi. Vladimir Putin 2022-yil aprel oyi o‘rtalarida Buchadan keyin muzokaralar jarayoni to‘xtaganini tan oldi.
Izoh (0)