Ukrainada mansabdor shaxslar va deputatlarni urushga safarbar qilish va jo‘natish chaqirig‘i bilan petitsiya uchun imzo to‘plash yakunlanmoqda.
3-dekabr holatiga ko‘ra, petitsiya 25 mingdan ortiq ovoz to‘plagan. U 5-sentyabr kuni Ukraina prezidenti Vladimir Zelenskiyning saytida ro‘yxatga olingan. Tashabbuskor Oliy Rada deputati Aleksandr Dubinskiy edi, u davlatga xiyonatda gumon qilinib, hibsda saqlanmoqda. Jamoaviy petitsiya “fuqarolarni, xususan, Ukraina deputatlari va davlat xizmatchilarini adolatli safarbar etishga yordam beradigan shoshilinch qonun loyihalarini” ko‘rib chiqishga chaqiradi.
“Ukraina konstitutsiyasining 65-moddasida vatanni, Ukrainaning mustaqilligi va hududiy yaxlitligini himoya qilish, uning davlat ramzlarini hurmat qilish Ukraina fuqarolarining burchi ekani qayd etilgan. Biroq safarbarlik uchun teng bo‘lmagan sharoitlarga olib keladigan qonunchilikdagi kamchiliklar mavjud. Xususan, Ukraina xalq deputatlari safarbarlik davrida harbiy xizmatga chaqirilmaydi. Bunday holatlar qonun oldida adolat tamoyilini buzadi, ijtimoiy keskinlikka salbiy ta’sir ko‘rsatadi.
Turli darajadagi xalq deputatlari va hukumat vakillarining safarbar etilishi barcha fuqarolar uchun sharoitlarni tenglashtirishga yordam beradi va ‘terroristik davlat’ ustidan g‘alaba qozonishga hissa qo‘shadi. G‘alabani tezlashtirish va ijtimoiy keskinlikni kamaytirish uchun ushbu qonunchilik tashabbuslarini zudlik bilan ko‘rib chiqishga chaqiramiz”, — deyiladi petitsiyada.
Izoh (0)