“Putinning muzokara olib borish niyatida ekani haqidagi gaplar mutlaqo illyuziya” — Podolyak

Ukraina prezidenti ofisi rahbari maslahatchisi Mixail Podolyak Italiyaning Corriere della Sera nashriga bergan intervyusida Rossiya bilan hech qanday muzokaralar yo‘qligi va Moskva muzokaralar o‘tkazish bo‘yicha Kiyevga taklif yubormaganini ta’kidladi, deb yozadi “RBK”.

“Yevropada, jumladan, Italiyada ham Putin muzokaralar olib borish niyatida degan fikr hukmron, ammo bu bo‘lmagan gap”, — dedi Podolyak.

Uning ta’kidlashicha, Vladimir Zelenskiy Rossiya bilan muzokaralarni boshlashning dastlabki shartlarini aytib o‘tgan — bu Rossiya armiyasi tomonidan bosib olingan hududlarni ozod qilish, xalqaro huquqni tan olish, tovon to‘lash va harbiy tribunal yaratish.

Kiyev qaysi prezident bilan muzokaraga tayyorligi haqida savolga javob berar ekan, Podolyak shunday dedi: “Avvalo eng muhim shartlar, ularni qabul qiladigan shaxs emas. Menimcha, Putin ularni qabul qilmaydi”. Uning so‘zlariga ko‘ra, Kiyev muloqotni Ukrainaning dastlabki shartlari bo‘yicha olib borishga rozi bo‘lgan siyosatchi bilan muzokaralarga tayyor. Biroq, rasmiyning ta’kidlashicha, muzokaralar bo‘yicha yakuniy qaror Zelenskiyda qoladi.

Sentabr oyi oxirida, Rossiyaga yangi hududlar qabul qilingandan so‘ng, Zelenskiy Putin rahbarligi davrida Ukraina Rossiya bilan hech qanday muzokaralar olib bormasligini ma’lum qilgan edi.

Rossiya hukumati Ukraina bilan muzokaralarga tayyorligini bir necha bor e’lon qilgan. 7-noyabr kuni prezident matbuot kotibi Dmitriy Peskov Kiyevning pozitsiyasi tufayli muloqotga imkoniyatni hali ko‘rmayotganini bildirdi.

Ukrainadan farqli ravishda Rossiya muzokaralar uchun hech qanday shartga ega emas. 8-noyabr kuni Rossiya Tashqi ishlar vaziri o‘rinbosari Andrey Rudenko Kremlning hech qanday old shartlari yo‘qligini, faqatgina Ukraina xayrixohligi ko‘rsatishi zarurligini ta’kidladi.

9-noyabr kuni Rossiya Tashqi ishlar vazirligi matbuot kotibi Mariya Zaxarova yana bir bor Rossiya “joriy vaziyatni hisobga olgan holda” muzokaralar uchun ochiqligini ma’lum qildi.

Ukraina prezidenti ofisi vakili Mixail Podolyak esa muzokaralarni “Kremlning ultimatumlarini tan olish” deb atab, qarshi tomonni “so‘z o‘yinini to‘xtatishga” chaqirdi.