Украинага 2022 йил март ойида бўлиб ўтган музокаралар доирасида тинчлик ўрнатиш эвазига НАТО аъзолигидан воз кечиш таклиф қилингани ҳақида хабарлар тарқалди. Украина президенти офиси раҳбари маслаҳатчиси Михаил Подоляк ўшанда урушни тугатишни Украинанинг ҳарбий бетарафлигига алмаштириш учун реал имконият бўлмаганини айтди. Бу ҳақда УНИАН хабар берди.
Маълум қилинишича, бундай масалани ҳар икки томон жиддий кўрмаган. Михаил Подоляк Украина делегацияси таркибида ўша музокаларда қатнашган. У потенциал тинчлик шартномаси лойиҳасида Украинанинг НАТОга аъзо бўлиш истагидан воз кечиш эвазига Россия қўшинларини демаркация чизиғига олиб чиқишни назарда тутувчи банд умуман бўлмаганини айтди.
Подоляк музокараларда Украина делегациясининг вазифаси Россия билан тинчлик шартномасини имзолаш эмас, балки Россия кенг кўламли босқинчилик билан қандай сиёсий мақсадларни кўзлаётгани — Кремль қанчалик узоққа боришга тайёрлигини тушунишга ҳаракат қилиш бўлганини айтди. Украина делегацияси бу вазифани бажаргани маълум қилинди.
“Ушбу музокараларда Россия ҳақиқатан ҳам Украина давлатчилигига нисбатан имкон қадар шафқатсизларча муносабатда бўлишни, яъни дипломатик босим қўшган ҳолда ҳарбий йўл билан бу давлатчиликни бутунлай йўқ қилишни хоҳлаётгани аниқ бўлди”, — дейди Подоляк.
Шунингдек, у Украина делегациясининг музокаралардаги иккинчи вазифаси “ички гуруҳлаш”ни амалга ошириш учун ҳарбий ҳаракатларда “оператив пауза” олиш истаги бўлганини билдирди.
Ўз навбатида, Россия музокараларда Украинани қуролсизлантиришни, ҳарбий блокларда иштирок этишдан бош тортишни ва аслида Украина суверенитетини йўқотишни талаб қилган. Подолякнинг таъкидлашича, Украинадан ҳеч қандай имтиёзларни урушни тугатиш ва Россия қўшинларини тўлиқ олиб чиқиш учун алмаштириш имконияти бўлмаган.
Босқиннинг бошида Россия—Украина музокаралари
Биринчи Россия—Украина музокаралари 28 февралда Беларуснинг Гомел шаҳрида, 3 ва 7 март кунлари Брестда бўлиб ўтди. Музокараларнинг кейинги босқичи 29 март куни Истанбулда бўлиб ўтган ва у охиргиси эди.
Кўп ўтмай, рус қўшинлари Украина шимолидан чекинишга мажбур бўлди ва бутун дунё Буча ва бошқа босиб олинган шаҳарларда русларнинг оммавий ваҳшийликлари тасвирига дуч келди. Владимир Путин 2022 йил апрель ойи ўрталарида Бучадан кейин музокаралар жараёни тўхтаганини тан олди.
Изоҳ (0)