Prezident huzuridagi Davlat xizmatini rivojlantirish agentligi “Davlat organlari faoliyatida inson huquq va erkinliklarini taʼminlanishiga rioya etilayotganini aniqlash tartibini joriy etish chora-tadbirlari to‘g‘risida”gi Vazirlar Mahkamasi qarori loyihasini muhokamaga qo‘ydi.
Hujjat bilan davlat organlari faoliyatida inson huquq va erkinliklarini ta’minlanishiga rioya etilayotganini reyting asosida baholovchi Inson huquq va erkinliklari indeksi joriy etiladi.
2025-yil 1-yanvardan boshlab mansabdor shaxslarni lavozimga tayinlash (saylash), xizmat bo‘yicha lavozimini ko‘tarish yoki tushirishda, maxsus unvonlar berishda Inson huquq va erkinliklari indeksi natijalarini inobatga olish amaliyoti joriy etiladi.
Shunday tartib o‘rnatiladiki, unga ko‘ra:
- Inson huquqlari bo‘yicha O‘zbekiston Milliy markazi Inson huquq va erkinliklari indeksini aniqlashda ishtirok etuvchi mas’ul idora va tashkilotlar faoliyatini muvofiqlashtiradi;
- Inson huquqlari bo‘yicha O‘zbekiston Milliy markazi davlat organlari bilan birgalikda Inson huquq va erkinliklari indeksida past natijalarga ega bo‘lgan sub’yektlarni aniqlaydi, tegishli indikatorlar bo‘yicha ko‘rsatkichlarni tahlil qiladi va ularning sabablarini o‘rganadi;
- davlat organlari aniqlangan kamchiliklarni bartaraf etish yuzasidan aniq takliflar va chora-tadbirlar ishlab chiqadi hamda ularni amalga oshirish choralarini ko‘radi.
Inson huquqlari bo‘yicha O‘zbekiston Milliy markazi “Ijtimoiy fikr” markazi hamda boshqa manfaatdor tashkilotlar bilan birgalikda:
- Inson huquq va erkinliklari indeksini aniqlash bo‘yicha aholi va soha mutaxassislari o‘rtasida tizim orqali o‘tkaziladigan ijtimoiy so‘rovlarni o‘tkazish dasturi va baholash mezonlarini hisoblash metodologiyasini tasdiqlaydi;
- Raqamli texnologiyalar vazirligi bilan birgalikda 2024-yil 1-iyulga qadar Tizimning ishlab chiqilishini va ishga tushirilishini ta’minlaydi;
- O‘zbekiston prezidenti administratsiyasi va Oliy Majlis palatalariga Inson huquq va erkinliklari indeksini aniqlash jarayonidagi muammolarni bartaraf etish bo‘yicha takliflar kiritib boradi.
Davlat organlari nomzodlarni lavozimga tayinlash, xizmat bo‘yicha lavozimini ko‘tarish yoki tushirishda, maxsus unvonlar berishda Inson huquq va erkinliklari indeksi natijalarini inobatga olish nazarda tutuvchi o‘z ichki tartiblarini ishlab chiqib, joriy qiladi.
Avvalroq 2024-yil 1-yanvardan boshlab Abdulla Avloniy nomidagi milliy-tadqiqot institutida umumiy o‘rta taʼlim muassasalari direktor lavozimiga nomzodlar menejerlik o‘quv kurslarida o‘qitilishi to‘g‘risida xabar berilgandi. Menejerlik o‘quv kurslarini muvaffaqiyatli tugatgan nomzodlar menejerlik sertifikatini berish bo‘yicha yakuniy sinovlarga qo‘yiladi.
Izoh (0)