O‘zbek Milliy akademik drama teatri aktyori Rixsitilla Abdullayev “Omon-omon” ko‘rsatuviga bergan intervyusida o‘g‘lini o‘z sinfdoshiga uylantirgani hamda oilasidagi o‘ziga xos tartib-qoidalar haqida so‘zlab berdi.
“Kelinli bo‘lish bilasizmi, yana bir farzandingiz tug‘ilganidek bo‘larkan. Kimdir sizga farzandingizni tarbiyalab, o‘qitib, hayotga tayyorlab bergandek bo‘larkan. To‘rtinchi farzanddek qabul qildik. Oilamdagi farzandlarim bilan kelinim bir-biriga begona emas. Chunki hammalari bitta maktabda o‘qishgan. O‘g‘lim ham u bilan parallel sinfdosh bo‘lgan. Ularning besh yillik muhabbati oxiri g‘alaba qozondi. O‘g‘lim otamga ichidagi tuyg‘ularini so‘zlab bergan. Shundan keyin ular harakatni boshlashgan. To‘yni o‘g‘limning tug‘ilgan kuniga belgilab qo‘ygandik”, — deydi Rixsitilla Abdullayev.
Shuningdek aktyor, nevara to‘yini ko‘rish uning ota-onasiga ham ijobiy ta’sir ko‘rsatganini ham aytib o‘tdi.
“Bilasizmi, nevaralarning to‘yini ko‘rish birinchi navbatda ota-onangizga juda yaxshi bo‘larkan. Ular bir yil davomida to‘yning shirin tashvishlari bilan ovora bo‘lishadi, shuning uchun xasta bo‘lishga ham vaqtlari qolmaydi. Insonlar bekorga nabira to‘yini kutishmas ekan. Chunki katta yoshdagi ota-ona, qaysidir ma’noda yasharar ekan. Bu narsani men o‘z isbotini ko‘rdim. Otam kelinlarga boshqacha mehr bilan qaraydilar. Parhez qilishsa, urishib beradilar. “Mening uyimda hamma do‘mboq bo‘lib yurishi kerak”, deydilar. Kelinimizni shu tarzda o‘zimizniki qilib oldik”, — deydi aktyor.
Izoh (0)