Salbiy rollarni qoyilmaqom ijro etadigan aktyor Rixsitilla Abdullayev 5-aprel kuni 45 yoshni qarshiladi. Nafaqat ijodda, balki hayotdagi ham o‘ta nozikta’b bo‘lgan ijodkor boshqa hamkasblari singari moddiy qiyinchiliklarni boshdan kechirmagan bo‘lsa-da, osonlikcha mashhur insonga aylangani yo‘q.
Tadbirkorlar oilasida tug‘ilgan ijodkor
Aktyor Toshkent shahrida, tadbirkorlar oilasida dunyoga kelgan. Uning oilasida to‘rt o‘g‘il bo‘lib, Rixsitilla Abdullayev ularning kenjasi hisoblanadi. Garchi oila a’zolari orasida san’atkorlar bo‘lmasa-da, u bolalikdan san’atga mehr qo‘yadi.
— Bolaligimiz ko‘p qavatli uyda o‘tgan. U paytlari hammaning uyida ham televizor, videomagnitafon bo‘lmasdi. Dadam xorijdan videomagnitofon olib kelgan. Yozgi ta’tilda bolalar uyda zerikib, biznikiga chiqardi. Talab yuqori bo‘lib ketganidan keyin texnikani birinchi qavatdagi hovliga olib chiqishga qaror qilganmiz. Keyin xayolimga tomoshani pulli qilish g‘oyasi kelgan. Ota-onalar ham bolalari ko‘z oldilarida ekanligidan xursand bo‘lib, pul berishardi. Ammo ko‘p o‘tmay qiziqish pasaygan. Chunki bolalarga bizdagi multfilmlar yod bo‘lib ketgandi. Keyin teatr tomoshalarini sahnalashtirish g‘oyasi paydo bo‘lgan. Balki ishonmassiz, ammo biz sahnalashtirgan tomoshalarda maxsus kiyimlar, rekvizitlar bor edi, — deydi aktyor Rixsitilla Abdullayev.
Imtihonda ko‘rinishi qo‘l kelgan
Rixsitilla Abdullayev Yunusobod tumanidagi 272-maktabni tamomlab, hozirgi O‘zbekiston davlat san’at va madaniyat institutiga hujjat topshiradi. Bo‘ylari baland, aslzodalarga xos ko‘rinishdagi abituriyent ijodiy imtihon oladigan ustozlarda qiziqish uyg‘otgan. Boisi drama aktyorligi bo‘limiga aktyor tanlanayotganda nafaqat uning iqtidori, balki tashqi ko‘rinishi ham hisobga olinadi.
.jpg)
— 1999-yilda institutni tamomlab, shaxdam qadamlar bilan teatrga ishga kelganman. Albatta, shtat asosida ishga olinishim oson bo‘lmagan. Shu orada “Toshkent” telekanali buyurtmasiga ko‘ra “Qirq tog‘oraning qirq nog‘orasi” nomli serial suratga olinadigan bo‘ldi. Teatrdagi barcha aktyorlar unga taklif etildi. Ular orasida men ham bor edim. Rolim juda kichik bo‘lsa-da, odamlarning yodida qoldi, — deydi Rixsitilla Abdullayev.
Rahbarining qiziga ko‘ngil qo‘ygan
Rixsitilla Abdullayev O‘zbekiston xalq artisti Yoqub Ahmedovning to‘ng‘ich qizi Nodira Ahmedova bilan oila qurgan. O‘sha paytda Yoqub Ahmedov O‘zbek milliy akademik drama teatrining direktori edi. Rahbarning qiziga ko‘ngil qo‘ygan oddiy aktyorning qaynotasidan rozilik olishi oson kechmagan.
.jpg)
— Oila qurishimiz juda qiziq kechgan. Nodiraning yaqin dugonasiga ko‘ngil qo‘ygandim. U haqdagi ma’lumotlarni Nodiradan olib turardim. Ammo ancha vaqtgacha uni Yoqub Ahmedovning qizi ekanligini bilmaganman. Keyin Nodiradagi ustun jihatlarni ko‘rib, unga sovchi yuborishga qaror qildim. U teatr rahbarining qizi ekanligini bilganimda sichqonning ini ming tanga bo‘lib ketgan. Fevral oyida sovchilarni yuborgan bo‘lsam, iyunga qadar ko‘zlariga ko‘rinmay yurganman. Hatto majlislarga kirganda ham bir chekkada indamay o‘tirardim va birinchi bo‘lib xonadan chiqib ketardim, — deydi aktyor.
Qaynotaning kuyoviga iltimosi
Nodira va Rixsitilla Abdullayevning Tojirahmon, Aslzoda va Mohizoda ismli farzandlari bor. Yoqub Ahmedov ulardan to‘ng‘ich farzandlarining ismini Tojirahmon deb qo‘yishni iltimos qilgan. Chunki ustoz san’atkor nabirasiga otasining ismini qo‘yishni orzu qilgan ekan.
Rixsitilla Abdullayev nafaqat kinoda, balki teatrda ham sermahsul ijod qilgan. “Qirol Lir”, “Makr va muhabbat” kabi xorij klassikasida rol ijro etgan. Unga “Navoiy” spektaklida bosh rolni ijro etish baxti ham nasib etgan.
Aktyor katta kinodagi ilk rolini “Muhabbat sinovlari”da ijro etgan. Ammo mazkur epizod rol unga mashhurlik keltirmagan. Oradan uch yil o‘tib, Rustam Sa’diyev uni “Kelgindi kuyov” filmiga taklif etgan. Suyunbek roli aktyorning komik mahoratini ko‘rsatishga turtki bo‘lgan. Oradan 18 yil o‘tgan bo‘lishiga qaramay Suyunbek tomoshabinlarning eng sevimli qahramonlaridan biri bo‘lib qolgan.
“Qaynotamdan ko‘p tanbeh eshitganman”
Rixsitilla Abdullayev deganda ko‘z oldimizga asilzoda, imijiga e’tiborli aktyor keladi. U liboslari va mayda aksessuarlar uchun ham katta mablag‘ sarflaydi.
.jpg)
— Bu borada qaynotamdan ham ko‘p marta tanbeh eshitganman. Qimmatbaho, bejirim narsalarni yaxshi ko‘raman. Hatto soat va bo‘yinbog‘ uchun ham ko‘p pul sarflayman. Oila qurmasimdan avval kiyim-boshimni tartibga keltirish uchta kelinoyimning vazifasi edi. Ular qaysi ishni yaxshi qilishlariga qarab, ishni taqsimlardim. Ya’ni bir kelinoyim shimni, boshqasi esa ko‘ylakni dazmollashga usta edi. Hozir bu ishlarni ayolimning o‘zi bajaradi, — deydi aktyor.
Uning turmush o‘rtog‘i Nodira Abdullayeva ingliz tili o‘qituvchisi. Aktyor ayolining ishlashi va tajriba orttirishiga qarshilik qilmay, uni qo‘llab-quvvatlaydi.
.jpg)
Rixsitilla Abdullayev ijoddan tashqari, tadbirkorlik bilan ham shug‘ullanadi. Uning sayohatlar uyushtiradigan va to‘y oqshomlarini tashkil etadigan firmalari bor.
.jpg)
Aktyorning o‘g‘li Tojirahmon Nig‘matullayev otasining kasbini davom ettirishga qaror qilgan. U ayni kunda aktyorlik bo‘yicha tahsil olib, teatrda kichik rollarni ijro etadi.
“Dilnoza Kubayevani rashk qilaman”
Aktyor intervyularining birida hamkasbi Dilnoza Kubayeva bilan nega rol ijro etishni yoqtirishi va uni boshqa aktyorlardan qizg‘anishi haqida gapirib bergan.
.jpg)
— Dilnoza bilan ilk marta "Andishali kelinchak" spektaklida partnyor sifatida ishlaganmiz. Men Arslonbek, Dilnozaxon Olmaxon rolini ijro etgan.
Dilnozani partnyor sifatida rashk qilaman. Rustam Sa’diyev va Gulchehra Jamilova, Lola Eltoyeva va Alisher Hamroyev, Zuhra Ashurova va Bekzod Muhammadkarimov kabi tomoshabinlarning sevimli kinojuftliklari bor. Umuman olganda, hamma aktyorning o‘z partnyori bor.
Ko‘p muxlislar Dilnoza Kubayeva bilan chiroyli juftliksiz, deb aytadi. Dilnoza bilan hozirda ‘O‘zbekcha ajrashish’ degan kinoda er-xotinlar obrazini gavdalantirmoqdamiz. U yangi filmda mahalla raisi rolini ijro etadi, — deydi Rixsitilla Abdullayev.
Izoh (0)