Energetika vaziri Jo‘rabek Mirzamahmudov “Daryo” nashriga bergan intervyusida nima uchun mamlakatda talab bo‘la turib, tabiiy gazni chet elga eksport qilishi haqida izoh berdi.
Jo‘rabek Mirzamahmudovning aytishicha, O‘zbekiston zimmasida qo‘shma korxonalar yoki mahsulotni taqsimlash bitimlari doirasida xorijiy hamkorlar bilan amalga oshirilgan investitsiya loyihalari bor.
“Ular juda katta investitsiyani geologiya qidiruv ishlariga, qazib chiqarishga, gaz tayyorlash, qayta ishlashga kiritgan sarmoyadorlar. Albatta shartnomalari tuzilganda xarajatlarni qoplash uchun maʼlum bir qism gazni eksport qilish ko‘zda tutilgan. Hozir aynan o‘sha gaz eksport qilinmoqda. Bu o‘zaro manfaatli bo‘lgan”, — dedi vazir.
Uning alohida taʼkidlashicha, O‘zbekistonda loyihalarni amalga oshirayotgan kompaniyalarni avallari juda katta hajmli gap eksportga yo‘naltirish ko‘zda tutilgan bo‘lsa, hozir olib borilgan muzokaralar natijasida asosiy qismi ichki bozorga yo‘naltirilyapti.
Shartnomalarda imzolangan maʼlum bir qismigina eksport qilinmoqda. Shuni aytib o‘tish kerakki, bu ichki isteʼmolga zarar yetkazmagan holda amalga oshiriladi.
Masalan, o‘tgan yili qishda eksportni umuman to‘xtatganmiz. Hozirgi kunda zapravkalar, sanoat obyektlariga gaz yetkazib berishni to‘xtatganimiz yo‘q. O‘tgan yili qishda hammasini to‘xtatganmiz, chegaralaganmiz. Ham anomal sovuq, ham isteʼmol oshgan. Hozirgi kunda yaratib berilgan sharoit tufayli barqaror energiya tizimini ushlab turishga muvofiq bo‘lyapmiz”, — dedi Jo‘rabek Mirzamahmudov.
Avvalroq Jo‘rabek Mirzamahmudov O‘zbekistonning Rossiyadan tabiiy gaz import qilishi siyosat bilan bog‘liq emasligini taʼkidlab o‘tgan edi.
Izoh (0)