Shavkat Mirziyoyev Saudiya Arabistonining ACWA Power kompaniyasi bilan Chirchiq shahrida yashil vodorod ishlab chiqarishga ixtisoslashtirilgan yirik loyihaga start bergandi.
Mazkur loyiha amalga oshirilishi natijasida respublikada 2,4 GVt quvvatga ega shamol turbinalari o‘rnatilishi, yashil vodoroddan yiliga 500 ming tonna yashil ammiak ishlab chiqarilishi ko‘zda tutilmoqda.
Bu nima beradi?
Butun dunyoda “yashil” energetika orqali, yaʼni yashil vodorod asosida ishlab chiqarilgan mineral o‘g‘itlarni 15-20 foiz qimmatroq sotish mumkin. Shu sababli O‘zbekistonda ham yashil, yaʼni ekologiya uchun xavfsiz energetikadan foydalanish mahsulotlar narxini jahon bozorida ham qimmatlashtiradi, ham xaridorlarini ko‘paytiradi. Bu esa davlat iqtisodiyotiga katta foyda.
Bugungi kunda Yevropa davlatlarida yashil mineral o‘g‘itlarga nisbatan ehtiyoj juda yuqori bo‘lib, zamon talablariga mos keladigan bu kabi mahsulotni ishlab chiqarish O‘zbekiston kimyo sanoati eksport geografiyasini yanada kengaytirishga xizmat qiladi.
Loyiha ishga tushgach, o‘g‘it ishlab chiqarishda tabiiy gazdan foydalanish qisqaradi va har yili qariyb 33 million metr kub tabiiy gaz iqtisod qilinadi. Loyiha doirasida birinchi bosqichda yiliga 3 ming tonna vodorod ishlab chiqarish va elektrolizerlar isteʼmolini qoplash uchun quvvati 52 MVt bo‘lgan shamol turbinalarini o‘rnatish rejalashtirilgan.
Mazkur loyiha O‘zbekistonda yashil energetikani rivojlantirish va iqtisodiyotga energiya tejamkor texnologiyalarni keng joriy qilishda muhim qadamlardan biridir.
Izoh (0)