O‘zbekistonda 2023-yil 1-dekabrdan boshlab haj ziyoratiga boruvchilarning yagona onlayn navbati barcha uchun ochiq bo‘ladi.
Bu haqda “Korrupsiyaga qarshi kurashish tizimini yanada takomillashtirish hamda davlat organlari va tashkilotlari faoliyati ustidan jamoatchilik nazorati tizimi samaradorligini oshirish chora-tadbirlari to‘g‘risida”gi prezident farmonida belgilandi.
Korrupsiyaga qarshi kurashish agentligi direktori Akmal Burxonovning yozishicha, haj ziyoratiga borishdagi firibgarlik holatlarining oldini olish va navbatga turish tizimini ochiq va shaffof bo‘lishini ta’minlash maqsadida haj ziyoratiga boruvchilarning yagona onlayn navbati doimiy yangilab boriladi va u barcha uchun ochiq bo‘ladi.
Farmonga ko‘ra, 2023-yil 1-dekabrdan boshlab quyidagi maʼlumotlar ham ochiq e'lon qilib boriladi:
- bolalarni davlat maktabgacha taʼlim tashkilotiga qabul qilish uchun berilgan arizalar navbati;
- bo‘sh ish o‘rinlari, ishga qabul qilish shartlari, nomzodlarga qo‘yiladigan talablar va taqdim qilinishi lozim bo‘lgan hujjatlar;
- nodavlat notijorat tashkilotlarga ajratilgan grant va ijtimoiy buyurtma loyihalari va bajargan ishlari yuzasidan hisobotlari.
Bundan bir necha kun avval Korrupsiyaga qarshi kurashish agentligi haj tadbiriga borish uchun navbatda turgan ziyoratchilarning yagona onlayn navbati to‘g‘risidagi maʼlumotlarni ochiq eʼlon qilinishi kerak bo‘lgan ijtimoiy ahamiyatga molik maʼlumotlar ro‘yxatiga kiritishni taklif qilgandi.
Izoh (0)