Finlandiya hukumati Rossiya hududidan qochib boshpana izlovchilar oqimini cheklash uchun sharqiy chegarani butunlay yopmoqchi, deb yozadi Helsingin Sanomat va Ilta Sanomat nashrlari.
HS ma’lumotlariga ko‘ra, Finlandiya hukumati chegarani yopishni o‘tgan haftadayoq rejalashtirgan. Bunda Xelsinki aeroporti kabi hududlarda boshpana so‘rash imkoniyatini saqlab qolish nazarda tutilgan.
Biroq tashabbusning mamlakat konstitutsiyasi va Yevropa Ittifoqi qonunchiligiga muvofiqligi sinovdan o‘tkazilmagan. Xususan, Finlandiya adliya vitse-kansleri Mikko Puumalaynen bunga qarshi chiqqan va taklif etilayotgan chora xalqaro himoyaga murojaat qilish huquqini saqlab qolishni kafolatlamasligini ta’kidlagan.
Ammo keyinchalik bosh vazir Petteri Orpo Finlandiya milliy xavfsizlik manfaatlari talab qilsa, Rossiya bilan chegarani butunlay yopishini aytdi, moliya vaziri Riikka Purra esa o‘zining shaxsiy blogida hukumat Adliya vazirligidan mustaqil ravishda chegaralarni yopish to‘g‘risida qaror qabul qilishi kerakligini yozdi.
Finlandiya hukumati zarur hujjatlarsiz Finlandiya chegarasini kesib o‘tishga urinayotgan uchinchi davlat fuqarolari sonining ko‘payishi sababli Rossiya bilan chegaradagi deyarli barcha nazorat-o‘tkazish punktlarini (Murmansk viloyatidagi bittadan tashqari) yopishga qaror qildi. Shu bilan birga, Finlandiya chegara xizmati yaqinda rossiyalik chegarachilar chegarani kesib o‘tish uchun zarur hujjatlarga ega bo‘lmagan odamlarni o‘tkaza boshlaganini qayd etdi.
Izoh (0)