Россия собиқ бош вазири Михаил Касянов “хорижий агент” деб тан олинди

Россия Адлия вазирлиги собиқ бош вазир Михаил Касяновни “хорижий агентлар” реестрига киритди. Бу ҳақда 24 ноябрь куни вазирлик сайтида хабар берилди.

Ундан ташқари, янгиланган рўйхатга тарихчи Илья Венявкин, журналистлар Илья Давлятчин ва Идрис Юсупов, шунингдек, “Люди” масъулияти чекланган жамияти киритилган.

Россия Адлия вазирлиги маълумотларига кўра, Венявкин, Давлятчин ва Касянов Украинадаги урушга қарши бўлган, Юсупов эса Россия ҳукумати қарорлари ҳақида “ёлғон маълумот тарқатган”. Вазирлик даъво қилишича, “Люди” ташкилоти “хорижий манбалардан ёрдам олган”.

Михаил Касянов 2000 йил майидан 2004 йил февралигача Россия ҳукумати раиси лавозимида ишлаган. У “Россия урушга қарши қўмитаси”нинг аъзоси ҳисобланади.

Россияда “хорижий агентлар” тўғрисидаги қонун

Россияда “хорижий агентлар” тўғрисидаги қонун 2012 йилда пайдо бўлган. Ўшандан бери бир неча юзлаб ташкилотлар ва шахслар ушбу рўйхатга киритилди.

“Хорижий агентлар” деб ҳисобланувчи жисмоний шахслар реестри 2022 йил апрель ойи бошида ишга туширилган бўлиб, у Нотижорат ташкилотлар – “хорижий агентлар”, ОАВ – “хорижий агентлар” ва рўйхатдан ўтмаган ташкилотлар – “хорижий агентлар” рўйхати билан бир қаторда тўртинчи рўйхат бўлди. 2022 йил декабридан бошлаб қонун “чет элдан кўмак оладиган” ва “чет эл таъсири остида” бўлганларни “хорижий агент” деб эълон қилишга рухсат берди.

Россия қонунчилигига кўра, “хорижий агент” деб эътироф этилган фуқаролар ва ташкилотлар ўз фаолияти ва харажатлари тўғрисида Адлия вазирлигига мунтазам равишда ҳисобот тақдим этиши, барча мақолаларида, жумладан, ижтимоий тармоқларда ҳам “хорижий агент” эканини белгилаб қўйиши шарт.