Rossiya Adliya vazirligi 1992-1993-yillarda tashqi ishlar vazirining o‘rinbosari, Rossiya Fanlar akademiyasining Jahon iqtisodiyoti va xalqaro munosabatlar instituti bosh ilmiy xodimi Georgiy Kunadzeni “xorijiy agent” deb e’lon qildi.
Adliya vazirligi saytida paydo bo‘lgan ro‘yxatdan siyosatshunos Mixail Savva va Vladimirdagi “Dovod” nashri bosh muharriri Ilya Kosigin o‘rin olgan.
Rossiya Adliya vazirligi ma’lumotlariga ko‘ra, har uchala shaxs “Rossiya davlat organlari tomonidan qabul qilingan qarorlar va ular olib borayotgan siyosat to‘g‘risida yolg‘on ma’lumot tarqatgan”. Xususan, Kosigin “chet el agentlarining xabarlari va materiallarini ko‘p odamlarga tarqatishda ishtirok etgan”. Jurnalist boshchiligidagi “Dovod” nashri avgust oyida “chet el agenti” sifatida tan olingan edi.
Kunadze esa “chet el tuzilmalari taqdim etgan axborot platformalarida tizimli ravishda respondent sifatida ishtirok etgan”, Savva bo‘lsa “Ukraina tashkilotining ekspertlar kengashi a’zosi”. Gap 2022-yilda Rossiyaning “Memorial” inson huquqlari jamiyati va Belarusning “Vesna” inson huquqlari markazi asoschisi Ales Belyatskiy bilan birgalikda tinchlik uchun Nobel mukofotini olgan Fuqarolik erkinliklari markazi haqida bormoqda.
Sentyabr boshlarida Rossiya Adliya vazirligi “Novaya gazeta” bosh muharriri, 2021-yilgi tinchlik bo‘yicha Nobel mukofoti sovrindori Dmitriy Muratovni “xorijiy agentlar” reyestriga kiritgandi.
Izoh (0)