O‘zbekistonda bachadon bo‘yni saratoniga qarshi milliy dastur yaratiladi

Prezident yordamchisi Saida Mirziyoyeva barchani bachadon bo‘yni saratoni haqida o‘z bilimlarini oshirishga chaqirdi.

Foto: Telegram / Saida Mirziyoyeva

Saida Mirziyoyevaning ma’lum qilishicha, hozirda ushbu kasallikka qarshi milliy dastur yaratish ustida ishlanmoqda.

“Bachadon bo‘yni saratoni kasalligi – global muammo va O‘zbekiston ham bundan chetda qolmagan. Ushbu kasallik bilan kurashishda chala-chulpa harakatlar hech qanday natija bermaydi.

Bugun – Bachadon bo‘yni saratoniga qarshi harakatlar kunida O‘zbekistonning ushbu kasallik profilaktikasi va unga qarshi kurashish bo‘yicha intilishlarini yana bir bor ta’kidlashni istardim. BMT Global qo‘shma dasturi yordamida biz yurtimizdagi har bir ayolning salomatligini asrash uchun jiddiy harakat qilishimiz lozim. Tashxis qo‘yish, davolash va palliativ yordam ko‘rsatishga qodir barqaror sog‘liqni saqlash tizimini yaratishimiz kerak.

Ijtimoiy sohaga mas’ul jamoamiz bilan yangi milliy dasturni yaratish ustida ish olib bormoqdamiz. Nihoyat, yurtimizning har bir burchagidagi ayollarga tashxis qo‘yish va davolash uchun barcha sharoitlar yaratiladi.

Men bu dardning oldini olish, o‘z vaqtida davolash uchun barchani ushbu kasallik haqida o‘z bilimlarini oshirishga chaqiraman.

Say’-harakatlarimiz xalqaro hamkorlarimizning beqiyos madadidan kuch olmoqda. Birgalikda biz bu baloni yengamiz”, — deydi Saida Mirziyoyeva.