Samarqand viloyatidagi 8 ta tuman va Samarqand shahar tibbiyot birlashmasi rahbar xodimlari jarimaga tortildi. Ular vakant lavozimlarga ochiq tanlovlarsiz ishchi qabul qilishda ayblangan. Bu haqda O‘zbekiston Respublikasi Prezidenti huzuridagi Davlat xizmatini rivojlantirish agentligi axborot xizmati rahbari Sevara Zokirova xabar berdi.
Ma’lum qilinishicha, Prezident huzuridagi Davlat xizmatini rivojlantirish agentligi Samarqand viloyati filiali tomonidan viloyatdagi sog‘liqni saqlash tizimi tashkilotlarida xodimlarni ochiq tanlov asosida ishga qabul qilish holati monitoring qilingan.
Monitoring davomida 11 ta tuman tibbiyot birlashmalarida 22 ta holatda mavjud vakant lavozimlarga ochiq tanlovlarsiz hamda tanlov g‘olibi aniqlangunga qadar “v.b.” sifatida xodimlarini ishga olish holatlari aniqlandi. Monitoring natijasi bo‘yicha Bulung‘ur, Jomboy, Narpay, Nurobod, Payariq, Paxtachi, Toyloq, Samarqand tumanlari va Samarqand shahar tibbiyot birlashmalarining 9 nafar rahbar xodimi jami 23 million 100 ming so‘m miqdorida ma’muriy jarimaga tortildi, — deydi agentlik axborot xizmati rahbari Sevara Zokirova.
Qo‘shimcha qilinishicha, noqonuniy ishga qabul qilinganlar bo‘yicha 22 ta buyruq bekor qilinib, tashkilotlarning Inson resurslarini rivojlantirish va boshqarish bo‘limlari boshliqlariga intizomiy chora qo‘llash uchun viloyat Sog‘liqni saqlash boshqarmasiga taqdimnoma kiritilgan.
Izoh (0)