O‘zbekistonda davlat tashkilotlarida ishlayotgan xodimlarning 5 foizini pensiya yoshidagilar tashkil etadi. Bu haqda AOKAda bo‘lib o‘tgan matbuot anjumanida Davlat xizmatini rivojlantirish agentligi departament mudiri Alisher Eranov ma’lum qildi, deya xabar bermoqda “Daryo” muxbiri.
Alisher Eranovning aytishicha, salohiyatli xodimlar pensiya yoshida ham davlat xizmatida faoliyat yuritishi mumkin.
“Bugungi kunda davlat xizmatida ishlayotganlarning 61 foizini 40 yoshgacha bo‘lgan xodimlar tashkil qiladi. Pensiya yoshidagilar esa 5 foiz. Qonunchilikda pensiya yoshida ham ishlash huquqi berilgan. Kadr pensiya yoshiga yetgandan keyin ishdan ketishi kerak degan gap noto‘g‘ri. U malaka talablariga javob beryaptimi, natijaga erisha olyaptimi, zamonaviy fikrlashga egami, davlat xizmatida bemalol ishlashi mumkin. Bu noto‘g‘ri emas”– dedi agentlik vakili.
Avvalroq davlat tashkilotlaridagi vakant ish o‘rinlariga bo‘lgan talab 50 barobarga ortgani ma’lum qilingandi.
“Avvallari bitta vakant joy bir kishiga to‘g‘ri kelardi va o‘sha odam ishga o‘tib ketardi. Endi bu vakant joy uchun ochiq tanlov o‘tkazilayotgani uchun institutni bitirgan 50 nafar yoshlar hujjat topshiryapti. Shundan 49 kishi ishga o‘ta olmayapti. Bundan keyin davlat xizmatiga kreativ, zamonaviy fikrlaydigan, professional kadrlar ochiq tanlov asosida ishga olinadi”, – deya ta’kidlagan edi Davlat xizmatini rivojlantirish agentligi direktori o‘rinbosari Otabek Hasanov.
Izoh (0)