O‘zbekiston o‘z infratuzilmasini modernizatsiya qilishga katta miqdorda sarmoya kiritmoqda. Bu haqda Toshkent shahrida 9-noyabr kuni bo‘lib o‘tgan Shveysariya kunlariga bag‘ishlangan matbuot anjumanida Shveysariyaning O‘zbekistondagi favqulodda va muxtor elchisi Konstantin Obolenskiy aytib o‘tdi, deya xabar bermoqda “Daryo” muxbiri.
Konstantin Obolenskiyning aytishicha, Shveysariya kunlarida asosiy e’tibor infratuzilmaga qaratilmoqda.
“Chunki hozirgi islohotlar bilan O‘zbekiston o‘z infratuzilmasini modernizatsiya qilishga katta miqdorda sarmoya kiritmoqda. Bular mamlakatni yanada rivojlantirishga yo‘l ochayotgan sarmoyadir. Ushbu investitsiyalar, albatta, istiqbolli va barqaror bo‘lishi kerak.
Shveysariya mahsulotlari nafaqat eng zamonaviy san’at asarlari ekanligi, balki o‘zining yuqori aniqligi, sifati va uzoq umr ko‘rishi bilan ham mashhurdir. Ishonchimiz komilki, Shveysariya tajribasi va nou-xausi O‘zbekiston rivojiga foyda keltirishi mumkin.
Bizning kompaniyalar sifat, innovatsiya va ishonchni ta’minlaydi va taqdim etadi. Ularning mahsulotlari va xizmatlariga quyidagilar kiradi: jamoat transporti tizimlari, chorvachilikni boshqarish tizimlarida, shuningdek, oziq-ovqat va ichimliklarni qayta ishlashda suv infratuzilmasi muhandisligi, qurilish, yo‘l qurilishi va tog‘-kon sanoati uchun yuqori aniqlikdagi uskunalar, energiya chiqindilarini yo‘qotish bo‘yicha yechimlarni o‘z ichiga oladi”, — dedi elchi.
Uning alohida taʼkidlashicha, Shveysariya kompaniyalarining O‘zbekistonga zamonaviy mahsulot hamda xizmatlarni olib kirishga qiziqishi aniq va bu qiziqish ortib bormoqda.
“Ayni paytda O‘zbekistonda 40 ga yaqin Shveysariya kompaniyalari quyidagi sohalarda faoliyat yuritmoqda: bular farmatsevtika sektoridan tortib logistika, oziq-ovqat, ichimlik, muhandislik, suv xo‘jaligi, to‘qimachilik mashinasozligi va infratuzilmagacha.
O‘tgan yili Shveysariya birinchi marta O‘zbekistonga eksport qiluvchi davlatlar yigirmataligiga kirdi. Ishonchim komilki, mamlakatlarimizning xususiy sektor hamkorligini yanada rivojlantirish salohiyatidan foydalanishning ayni vaqti keldi. Bu salohiyatni ro‘yobga chiqarishga ko‘maklashayotgan O‘zbekiston hukumati va turli idoralar, jumladan, O‘zbekiston prezidenti huzuridagi Xorijiy investorlar kengashidan juda minnatdorman”, — dedi Konstantin Obolenskiy.
Maʼlumot uchun, Shveysariya kunlari O‘zbekistonda ikkinchi marta o‘tkazilmoqda.
Izoh (0)