O‘zbekistonning BAAdagi elchixonasi va Dubaydagi Bosh konsulligi xodimlarining Facetime Management Service (FMS) kompaniyasi rahbari, Shveysariya biznes kengashi a’zosi Nadin Patrik Kudin bilan uchrashuvi bo‘lib o‘tdi, deb xabar bermoqda “Dunyo” AA.
1999-yildan buyon BAAda faoliyat ko‘rsatib kelayotgan FMS vakili bilan Buxoro, Zomin va Bo‘stonliq turizm kollejlarida mehmonxona boshqaruvi, servis va boshqa yo‘nalishlarda Shveysariya ta’lim tizimi asosida yangi o‘quv dasturlarini joriy etish va boshqa masalalar muhokama qilindi.
O‘zbekiston diplomatlari ushbu 3 ta ta’lim muassasasi bo‘yicha batafsil ma’lumot berish maqsadida alohida taqdimot o‘tkazdi. Nadin Patrik Kudin FMS kompaniyasi faoliyati haqida to‘xtalar ekan, u Shveysariya ta’lim tizimi litsenziyasiga ega ekanini ma’lum qildi.
Shveysariya biznes kengashi a’zosi oktabr oyida O‘zbekistonga kelish istagini bildirdi. Uning aytishicha, safar davomida Toshkent, Jizzax va Buxoro viloyatlaridagi ta’lim muassasalari faoliyatini o‘rganish, shuningdek, Bandlik va mehnat munosabatlari vazirligi tizimidagi monomarkazlar faoliyati bilan tanishish rejalari bor.
Buxoro, Zomin va Bo‘stonliq turizm kollejlari bilan hamkorlikni yo‘lga qo‘yish bo‘yicha kelishuvlar bitimini 2022-yil 30-noyabr–2-dekabr kunlari bo‘lib o‘tadigan Toshkent xalqaro turizm yarmarkasi doirasida imzolashi mumkinligi qayd etildi.
Izoh (0)