Shveysariyaning UBS banki o‘zi egalik qiluvchi Credit Suisse banki xodimlariga pul yuvish, poraxo‘rlik va korrupsiya xavfini cheklash uchun xavf darajasi yuqori mamlakatlardan, shu jumladan, O‘zbekistondan yangi mijozlarni jalb qilishni taqiqladi, deb yozmoqda Financial Times.
Nashr maʼlumotlariga ko‘ra, UBS jiddiy muammolarga uchragan raqibiga egalik qilishni boshlaganidan keyin Credit Suisse bankirlariga qattiq cheklovlar qo‘ygan, xususan, yuqori xavf toifasiga kiruvchi mamlakatlardan yangi mijozlar jalb qilish taqiqlangan.
Pul yuvish, poraxo‘rlik va korrupsiya xavfini cheklash uchun yangi mijozlarni jalb qilish taqiqlangan mamlakatlar ro‘yxatida Afg‘oniston, Albaniya, Belarus, Burkina-Faso, Kongo, Salvador, Eritreya, Efiopiya, Gvineya, Gaiti, Iroq, Kosovo, Qirg‘iziston, Liviya, Moldova, Myanma, Nikaragua, Falastin, Rossiya, Shri-Lanka, Sudan, Tojikiston, Turkmaniston, Venesuela, Yaman, Zimbabve va O‘zbekiston borligi aytilgan.
UBS va Credit Suisse banklarining o‘zi bu qoidalar yuzasidan izoh berishni istamadi.
Qayd etilishicha, ikki bank birlashtirilgan kundan boshlab Credit Suisse xodimlariga bir qator faoliyatni taqiqlovchi yigirmaga yaqin “qizil chiziqlar” ro‘yxati tuzilgan. Potensial pul yuvishning oldini olish uchun ukrainalik siyosatchilar va davlat korxonalari ham bloklanishi aytilgan.
Credit Suisse xodimlari, shuningdek, UBS rahbarlaridan yaxtalar, kemalar va 60 million dollardan ortiq ko‘chmas mulk kabi aktivlar bilan taʼminlangan kreditlar muddatlarini uzaytirish uchun ruxsat so‘rashi kerak bo‘ladi.
Eslatib o‘tamiz, Mustaqil media markazlar va jurnalistlar xalqaro tarmog‘i platformasi OCCRP Shveysariyaning Credit Suisse bankidan sizdirilgan 18 mingdan ortiq hisob raqamlarini o‘rganib, bank xizmat ko‘rsatgan muammoli mijozlarni aniqlagan edi. Bank tomonidan xizmat ko‘rsatilgan bunday mijozlar orasida yuqori lavozimli siyosatchilar va ularning yaqinlari bor. Ular orasida 4 nafar o‘zbekistonlik ham mavjudligi xabar qilingan.
Izoh (0)