“Dizayn” jamoasi a’zosi, komik aktyor Dilshod Musabekov 1975-yilning 13-iyul kuni tavallud topgan. Ota-onasi uning san’atkor bo‘lishini orzu qilishgan.
Asli mutaxassisligi sozandalik
Asli mutaxassisligi bo‘yicha sozanda, bir necha yil davomida doira chalish sirlarini o‘rgangan. Qattiqqo‘l ustozlaridan dakki eshitgan kunlarini quyidagicha eslaydi.
— Otam rahmatli “Eti sizniki, suyagi bizniki” deb ustozlar qo‘liga topshirgan. U paytlarda yoshlarning tarbiyasi ham boshqacha bo‘lardi. Sozanda bo‘lsak ham, tartib-qoidaga jiddiy e’tibor berishardi. Yoqa kir bo‘lsa, darsga kiritishmasdi. Ustozning ko‘ziga tik qaray olmasdik. Chalib turgan musiqamizni “Qayta chal” desa, o‘zimizni yo‘qotib qo‘yardik, — deydi Dilshod Musabekov.
Yetti yoshida olingan duo ijobati
Dilshod Musabekov 7 yoshida “Xalqlar do‘stligi” san’at saroyida o‘tkazilgan konsertda ishtirok etgani va ustoz san’atkor uni duo qilganini quyidagicha eslaydi.
— 7 yoshimda ansamblimiz bilan “Xalqlar do‘stligi” san’at saroyida o‘tkazilgan konsert dasturida ishtirok etishga kelganmiz. Qoradan kelgan, bo‘yi kichkinagina bola edim. Sochlarim qo‘ng‘iroq bo‘lgani uchun atrofdagilar erkalashardi. Navbatimiz kelishini kutib o‘tirsam, o‘z davrining mashhur askiyachisi Zaynobiddin aka yoniga chaqirgan. Tizzasiga o‘tkazib, bir nechta savollar bergan. Keyin “Sen ham katta bo‘lib shu saroyda konsertlar bergin, odamlarni kuldirgin”, deb duo qilgan. Bu gapga unchalik e’tibor bermagan ekanman. Harbiy xizmatdan qaytib QVZga qo‘shilgandan keyin bu duo haqida ko‘p o‘yladim. Zaynobiddin ustozning uylariga borib, o‘sha kunlarni eslab fotiha o‘qib qaytgandim, — deydi Dilshod Musabekov.
“Oliy ma’lumotli emasman”
Qahramonimiz tabiatan sho‘x bo‘lgani, ammo sozanda ustozlarining oldida og‘ir -bosiq bo‘lib qolishi va institutdan haydalishining sabablari haqida aytib o‘tdi.
— Bolaligimda juda sho‘x bo‘lganman. Ammo ustozlarimdan qo‘rqardim. Shuning uchun ustozlarimga begona inson “Shogirdingiz juda sho‘x-da”, deyishsa ishonishmasdi. Sho‘xligim sabab institutning 3-kursida o‘qishdan ham haydalganman. Oliy ma’lumotli bo‘lishimga bir yilgina vaqt qolgandi. Mayli, peshana ekan, hayotim san’at bilan bog‘lanib ketdi, — deydi DIlshod Musabekov.
“Mardikorlik ham qilganman”
Dilshod Musabekov yigitchilik damlaridagi moliyaviy qiyinchiliklar haqida gapirib o‘tdi.
— Ukam shartnoma asosida o‘qishga kirganda ota-onamga yordam beraman, deb bozorda arava tortganman. Undan keyin material va mashina ballonlari sotiladigan do‘konlarda ham ishlaganman. Bir kuni Mansur ismli qo‘shnim bilan birga 150 so‘m pul evaziga mardikorlik ham qilganman. “O‘zgarish” mahallasiga borib, katta hovlining eskirgan ta’mirini shilib, qaytadan oqlaganmiz. Uy egasi 300 so‘m pul bergan, Mansur aka teng yarmini bergandi. U paytda mushtumzo‘rlar ko‘p edi, bittasi pulim borligini bilib, yarmini berasan deb turib olgan. Urishib, unga bir so‘m pulni ham bermay, uyga olib kelganman. Undan keyin mashina moyini almashtiradigan shoxobchada ham ishlaganman, — deydi Dilshod Musabekov.
“1 500 so‘mdan chipta sotganmiz”
“Dizayn” kulgi jamoasi tashkil etilishidan avval Dilshod Musabekov tijorat bilan shug‘ullanardi. Ammo u tushundiki, san’at va biznesni birdek yuritolmaydi. Shu bois u tayyor biznesidan voz kechishga qaror qilgan.
— “Quvnoqlar va zukkolar”da chempion bo‘lganimizdan keyin Qobil, Sa’dulla va Abdurahmon bilan o‘tirib, nima qilish haqida gaplashganmiz. Ular bir ovozdan “Dizayn”ni rivojlantiramiz, deyishgan. Ikkisiga ulgurolmasligimni bilib, tayyor biznesimdan voz kechishimga to‘g‘ri kelgan. Qobil mashinalarga narx qo‘yish, Sa’dulla stilistlik, Abdurahmon esa katta korxonada master bo‘lib ishlardi. Hammamiz ishimizdan voz kechib, “Dizayn”ni rivojlantirishga qaror qilganmiz. Ammo oradan ko‘p vaqt o‘tmay, katta qiyinchiliklarga uchraganmiz. Pul yo‘q, “Dizayn” konsert bersin, deb qaysi davraga bormaylik, turli bahonalar bilan eshikni ko‘rsatib yuborishardi. Andijon viloyatining Baliqchi tumanidagi kollej va litsey talabalariga konsert beramiz deb borganmiz. Ayni sovuq kunlar edi. Biz turadigan uyda qipiq yoqilar ekan. 13 kun davomida o‘sha uyda turib, ertalabgacha muzlab, keyin ijodiy uchrashuvlarga borardik. Niyatimiz jamoani reklama qilish va 1 500 so‘mdan bo‘lsa ham, chiptalarni sotib, yo‘lkira pulini chiqarish edi. Men bor-yo‘g‘i 13 yil avvalgi voqealar haqida gapiryapman. Hech esimdan chiqmaydi, Sa’dulla bilan Qobil shaharga ketganda Abdurahmon bilan rosa yig‘laganmiz. “Nima qilib qo‘ydik, tayyor ishdan voz kechib, san’atni tanladikmi?”, deb afsuslangandik. 2018-yilga kelib “Dizayn” o‘z o‘rnini va muxlislarini topdi, — deydi Dilshod Musabekov.
“20 yoshli singlim vafot etgan”
Har bir insonning hayotidagi og‘ir damlar bo‘ladi. 1999-yil Musabekovlar oilasiga nihoyatda og‘ir keldi. Qahramonimiz bir kunda singlisi va endigina tug‘ilgan jiyanidan ayrildi.
— Singlim bor-yo‘g‘i 20 yoshni qarshilagan edi. Yolg‘iz singlim bo‘lgani uchun unga mehrimiz bo‘lakcha edi. Afsuski, farzandli bo‘layotganida o‘zi ham, qizi ham olamdan o‘tdi. Ota-onam qattiq kuyunishdi, hatto otam xastalanib ham qoldi. Singlim xotirasi uchun to‘ng‘ich qizimga uning ismini qo‘ydim. Kenja qizimni esa jiyanimning ismi bilan atadik. Hozir Nodira va Nozima qizlarimga qarasam, singlimni ko‘rgandek bo‘laman, — deydi Dilshod Musabekov.
“Obid Asomov qayta-qayta yozdirgan matn”
Dilshod Musabekov Obid Asomovning nazariga tushishi va u bilan bog‘liq xotiralarini ham so‘zlab berdi.
— “Sen aziz va muqaddassan ayol” konsert dasturida birga ishtirok etadigan bo‘ldik. Obid Asomov bizga mavzu berib, “Uylaringda ijod qilib kelinglar”, dedi. Menga berilgan topshiriqqa ko‘ra, matnni she’riy tarzda o‘qiydigan Gulhida Jo‘rayevaning yo‘nalishida hazil matn yozishim kerak edi. Uch marta qayta va qayta uringanman. Ammo Obid Asomovga matnning ma’qul kelishi oson kechmagan. Men ham taslim bo‘lmaganman. Natijada Dilnoza Kubayeva bilan bo‘lgan chiqishimiz barchaga ma’qul kelgan, — deydi Dilshod Musabekov.
“Otam o‘lgach, konsertga chiqishga majbur bo‘lganman”
“Dizayn” kulgi jamoasining a’zosi Dilshodbek Musabekov 2012-yil otasi vafot etgan kunning ertasiga konsert dasturida ishtirok etishiga to‘g‘ri kelgan. Afsuski, kasb mas’uliyati sabab u dardini ichga yutib, xalqni kuldirishga majbur bo‘lgan.
— Otamni yo‘qotish juda og‘ir bo‘lgan. Ertasi kuni konsert bo‘lishi kerak, ammo ko‘nglimga qil ham sig‘maydigan holatda edim. Jamoadagi yigitlar kelib, istasangiz konsertni qoldiramiz. Hech qanday muammo bo‘lmaydi, xavotir olmang, deyishdi. Chunki ularning ham ahvoli u qadar yaxshi emasdi. Biz avvaldan oilaviy do‘st bo‘lganimiz uchun bir-birimizning quvonch-u g‘amimizga sherik edik. Shunda onam nima bo‘lgan taqdirda ham, sahnaga chiqishib kerakligini va belgilangan konsertni qoldirishga haqqim yo‘qligini tushuntirdi. Xo‘p, deb konsertda ishtirok etdim. Yig‘lab turib odamlarni kuldirish naqadar og‘ir ekanini o‘shanda bilganman”, — deydi Dilshodbek Musabekov.
“Dizayn” ayrilishi mumkinmi?
Kulgi jamoalarining ajralishi yoki qaysidir a’zoning yakka ijod qilishi yangilik bo‘lmay qoldi. Xo‘sh, “Dizayn” a’zolari ham ayro ijod qilishi mumkinmi? Bu savolga Dilshod Musabekov quyidagicha javob berdi.
— Har bir insonning o‘z qarichi bo‘ladi. Men Dilshod Musabekov emas, “Dizayn” jamoasi a’zosi sifatida tanilganman. Shunday ekan, jamoa bilan ijod boshladimmi, uning yakuni ham shunday bo‘ladi. Bu bilan yakka ijod qilolmayman demoqchi emasman. Ijodimga befarq bo‘lmagan insonlar sahnada yakka chiqish qila olishimni yaxshi bilishadi, — deydi Dilshod Musabekov.
Kulgi jamoalari orasida tarkib o‘zgarishi, sobiq ishtirokchilarning yakkaxon tarzda ijod qilishi odatiy holga aylanib qoldi. Faqatgina “Dizayn” jamoasida bunday yangilanish bo‘lgani yo‘q. Xo‘sh, agar jamoa a’zolaridan biri yakka ijod qilishni istasa, bu boshqalarga qanday ta’sir etadi?
— Avvaldan bizda bitta qoida bor. Agar jamoa a’zolaridan biri guruhni tark etsa, o‘sha kuni “Dizayn” jamoasining faoliyati to‘xtatiladi. Chunki bitta ishtirokchining jamoani tark etishi “Qandaydir nizoli vaziyat yuzaga kelgan”, degan shov-shuvli mish-mishlarning tarqalishiga sabab bo‘ladi. Xayrlashib, turli sabablarni tushuntirgandan ko‘ra faoliyatimizni to‘xtatganimiz yaxshiroq, — deydi “Dizayn” jamoasi a’zosi Dilshod Musabekov.
Dilshod Musabekov uch farzandning otasi. Shu yilning yanvar oyida esa nabirali bo‘lganini ma’lum qildi.
Izoh (0)