“Daydi” qo‘shig‘i bilan muxlislar eʼtiboriga tushgan xonanda Dilnoz Hakimova ilk marta oilasi, otasi va unga bildirilgan nomaqbul takliflar haqida gapirdi.
— Onam ichki ishlar xodimasi bo‘lib, qatʼiy ish tartibida ishlaydigan ayol bo‘lgan. Oilada uchta qizmiz, ikki singlim til sohasi bo‘yicha o‘qishyapti. Bakalavr bosqichini yakunlab, magistraturani Italiyada o‘qishni reja qilishyapti. Ko‘pchilik toshkentlik deb bilar ekan, ammo men Farg‘onada tug‘ilib o‘sganman. Sanʼatkor bo‘lishimni mendan ham ko‘ra ko‘proq onam istagan. To‘rtinchi sinfimda o‘qiyotganimda Qo‘qonda yaxshi studiya bor edi. Erinmay, ishidan javob so‘rab o‘sha yerga olib kelardi. Otam haqida ko‘p so‘rashgan, ammo shaxsiy hayotim haqida to‘xtalishni unchalik yoqtirmayman. Otam bor, ammo otalik mehrini ko‘proq bobomdan olganman. Otam bilan munosabatlarimiz u qadar yaqin bo‘lmagan, ammo hamma masalada bobomga suyanolganmiz. Yaqinda ota haqida qo‘shiq aytdim. To‘g‘risi, bu mavzuda kuylab bunchalik yig‘layman, deb o‘ylamagandim, — deydi Dionoz Hakimova.
Jurnalist Go‘zal Muhammedova xonandani ochiq liboslarni kiyishda aybladi.
— Chiroyli va zamonaviy kiyinishni yaxshi ko‘raman. Ammo mening ham o‘z uslubim va meʼyorim bor. Liboslarim u qadar ochiq emas, meʼyorga hamisha amal qilaman, — deb javob berdi xonanda.
Ko‘pchilik sanʼat vakillari nomaqbul takliflar berishgani haqida gapirishadi. Xonanda Dilnoz ham bunday takliflar berishgani va u o‘zidan xafa bo‘lgani haqida aytib o‘tdi.
— Afsuski, bunday takliflar bo‘lib turadi. Ammo birinchi marta eshitganimda juda qiyin vaziyatga tushganman. Yaʼni “Nega menga bu gapni aytishga haddi sig‘di, nimada xato qildim?” deb o‘z-o‘zimni koyiganman. Keyin tushundimki, baʼzi insonlarga imkoniyat yaratmasangiz ham, g‘arazli taklifini berishga harakat qilib ko‘radi. Diplomatik yo‘l bilan “Rahmat, men siz o‘ylagan inson emasman”, deb vaziyatdan chiqishni o‘rgandim. Prodyuserlikni taklif qilishadi-yu, ketidan “sizni ham yoqtirib qoldim”, deb qo‘shib qo‘yishadi. Shou-biznes prinsiplarimdan kechishimga arzimaydi. Men bu qozonda qaynash uchun o‘zligimni o‘zgartirmayman, — deydi Dilnoz Hakimova.
Izoh (0)