“Бу ер сенга каптархона эмас” — Дилшод Мусабеков ёрдам беришни истамаган дўсти ва қолдирилишига оз қолган концерти ҳақида (видео)

“Дизайн” жамоаси аъзоси Дилшод Мусабеков “Дарё”га берган интервьюсида яқин дўстининг ишончсизлик билдиргани, қолдирилган концерт ҳақида эшитиб, соғлиғи ёмонлашгани ва қийин вазиятда уларни қўллаган инсонлардан ҳамиша миннатдорлиги ҳақида гапирди.

— Фаолиятимни хонандалик ва созандаликдан бошлаганман. У пайтлари ёш ижодкорларнинг ишлари камдан кам ҳолларда телевидениеда намойиш этиларди. Профессионал студияда қўшиқ айтиб, яхши клип суратга олиб, “Пахтакор” телевидениесига келганман. У ерда партадош дўстим ишларди. Дискни қўлига бериб, “Бор маблағимни сарфлаб клип олдим, илтимос, шуни чиқаришимга ёрдам бер”, деганман. “Бу ер сенга каптархона эмас, дуч келган одам чиқавермайди”, деган. Мана шу гап ҳалигача эсимдан чиқмайди.
Баъзи хонандалар давлат ва хусусий каналларини ажратишади. Яъни давлат каналларига чақиришса, менсимай туришади. Мен эса бир неча йил олдин ўша ердан бошимни эгиб чиқиб кетганимни ҳеч қачон эсимдан чиқармайман. Чақиришса, хурсанд бўлиб бораман, телеканалларни бир-биридан ажратмайман, — дейди Дилшод Мусабеков.

“Дизайн” жамоаси аъзоси Дилшод Мусабеков катта қийинчиликлар билан концерт бергани, танилиш осон кечмагани ҳақида гапирди.

— Жамоа ташкил этилганидан кейин Андижон вилояти Балиқчи туманига борганмиз. Ўн уч кун совуқ уйда яшаганимиз ҳеч қачон ёдимиздан чиқмайди. Газ йўқлиги учун томдан тахтанинг пайрахаларини олиб тушиб, бочкага солиб ёққанмиз. Уй жуда тез исиб, аммо кўп ўтмай совиб қоларди. Эрталабгача музлаб қолардик. У пайтларда концерт қўйиш тартибини яхши билмасдик. Коллежларга бориб, ўзимизни таништирардик ва концерт қўйиш ниятимиз борлигини айтардик. Оммавий тадбирларни ўтказиш учун бир нечта ташкилотлардан руҳсат олиш кераклигини билмаган эканмиз. “Абдураҳмон, ҳамма ўзининг ишидан кечиб, санъатни танлади. Энди ҳар доим шунақа юрамизми?” деб йиғлаганман. Бу гапларимни эшитиб, у кўзига ёш олган.

Кейин энг катта зарбани “Халқлар дўстлиги” санъат саройида бериладиган концертга уч кун қолганида олганмиз. Бир ташкилот концертни ўтказиб берамиз, деган. Тайёргарлик кўриб, чипталарни сотиб, уч кундан кейин концерт, деб турган пайтимизда олдига борсак, “Қанақа концерт? Сенларнинг концертингга ким тушади?” деган. “Энди нима бўлади?” деб Чилонзорда йўл четида Қобил билан “валерианка” ичиб ўтирганмиз. Шу пайт “Дизайн” жамоасининг асосчиларидан бири бўлган Шаҳбоз исмли йигит қўнғироқ қилиб қолди. Вазиятни билганидан кейин, “Туринг ўрнингиздан, бошингизни кўтаринг. Бу нима ўтириш?” деб уй манзилини берган ва ўша ерга бориб, бошқа концерт ташкилотчиси билан гаплашиб кўришимизни айтган. Борсак, “Сурхон” гуруҳи аъзоси Илҳом ака кутиб олган. У киши концертларни ҳам ўтказадиган ташкилотчи экан. Яхши кутиб олиб, дардимизни эшитди. “Сизларни ёшлар таниса керак, мен-ку концерт беришдан қочмайман, аммо...” деб турганида иккита қизчаси келиб, биздан дастхат сўраган. “Бу акаларингни танийсизларми?” деб сўраганида, ҳа, булар “Дизайн”да чиқишади,— деб жавоб беришган. Шундан кейин Илҳом ака бир кун катта саройда концерт ўтказиб беришга рози бўлган. Эвазига “Сурхон” гуруҳининг икки кунлик концертида бошловчи бўлиш вазифасини юклаган, — дейди Дилшод Мусабеков.

Видеони тўлиқ ҳолда YouTubeъдаги каналимиз орқали томоша қилинг.