O‘zbekistonda yangi tashkil etilgan Pillachilik va qorako‘lchilikni rivojlantirish qo‘mitasiga rahbar va o‘rinbosarlar tayinlandi. Bu haqda qo‘mita matbuot xizmati xabar berdi.

Prezident Shavkat Mirziyoyevning 2020-yil 15-sentabrdagi qaroriga asosan Bahrom Sharipov Pillachilik va qorako‘lchilikni rivojlantirish qo‘mitasi raisi lavozimini egalladi. U 2017-yilning aprel oyidan buyon “O‘zbekipaksanoat” uyushmasi boshqaruvi raisi lavozimini egallab kelayotgandi.

Foto: Pillachilik va qorako‘lchilikni rivojlantirish qo‘mitasi

Behzodjon Yusupov Pillachilik va qorako‘lchilikni rivojlantirish qo‘mitasi raisining birinchi o‘rinbosari lavozimiga tayinlandi.

Sherzod Asadov Pillachilik va qorako‘lchilikni rivojlantirish qo‘mitasi raisining o‘rinbosari lavozimiga tayinlandi.

Eslatib o‘tamiz, ushbu qo‘mita Shavkat Mirziyoyevning “O‘zbekiston Respublikasida pillachilik va qorako‘lchilikni yanada rivojlantirish chora-tadbirlari to‘g‘risida”gi farmoni bilan 2020-yil, 3-sentabr kuni tashkil etildiQo‘mitaning asosiy vazifasi quyidagilardan iborat:

  • pillachilik va qorako‘lchilik sohasida yagona davlat siyosatini olib borish, shuningdek, ushbu tarmoqlarni yagona ilmiy-texnikaviy siyosatni yuritgan holda, muvofiqlashtirilgan tarzda rivojlantirishni ta’minlash;
  • tut plantatsiyalari va yaylovlarning qat’iy hisobini yuritish va fondini o‘rganish, shuningdek, pillachilik va qorako‘lchilikni rivojlantirish uchun ozuqa bazasini yaxshilash;
  • ipak qurti va qorako‘l zotli qo‘ylarning yuqori darajada mahsuldor nasllarini joriy qilish;
  • pilla va qorako‘l terisidan tayyor mahsulot ishlab chiqarish maqsadida xomashyo tayyorlash va uni qayta ishlash uchun qulay sharoitlar yaratish;
  • marketing tadqiqotlarini o‘tkazish hamda ipak va qorako‘ldan tayyorlangan mahsulotlarni eng avvalo tashqi bozorlarda sotishga ko‘maklashish;
  • pillachilik va qorako‘lchilik bilan shug‘ullanuvchi tadbirkorlik subyektlariga o‘z faoliyatini kengaytirish, klasterlar tashkil etish va mahsulotni eksport qilishda har tomonlama yordam berish.

Avvalroq Moliya vaziriga yangi o‘rinbosar tayinlangani, O‘zbekiston FVV markaziy apparatida hamda Ichki ishlar vazirligi tizimida yangi lavozim tayinlovlari amalga oshirilgani xabar berilgan edi.