Vazir o‘rinbosari Nishon tumaniga, Nishon hokimi esa Muborak tumaniga hokim bo‘ldi

Qashqadaryo viloyatining yana ikki tumanida hokim o‘zgardi. Bu haqda viloyat hokimligi axborot xizmati xabar berdi. 

Ma’lum bo‘lishicha, ayni kunga qadar Nishon tumani hokimi sifatida faoliyat yuritib kelgan Muxtor Hayitmurodov Muborak tumani hokimi etib tayinlandi. 

Tashkiliy masala bugun xalq deputatlari Muborak tumani Kengashining navbatdan tashqari sessiyasida ko‘rib chiqilib, deputatlar Hayitmuradov Muxtor Qo‘ldoshevichni Muborak tumani hokimi lavozimiga tasdiqlagan. 

Muxtor Hayitmuradov 1970-yilda G‘uzor tumanida tug‘ilgan bo‘lib, Toshkent davlat agrar universiteti va Bank-moliya akademiyasini tamomlagan.

Muxtor Hayitmurodovning o‘rnini Qishloq xo‘jaligi vazirining birinchi o‘rinbosari sifatida ishlab kelgan Botir Tog‘ayev egallagan.

Botir Tog‘ayev 1976-yilda Kitob tumanida tug‘ilgan bo‘lib, Toshkent davlat agrar universiteti va O‘zbekiston Respublikasi prezidenti huzuridagi Davlat boshqaruvi akademiyasini tamomlagan. Tayinlovga qadar Qishloq xo‘jaligi vazirining birinchi o‘rinbosari lavozimida, ungacha esa Qamashi tumani hokimi sifatida ham faoliyat ko‘rsatgan.