Namanganlik jurnalist Zokirjon Yigitaliyev uzoq yillar davomida matbuot, radio va televideniyeda ishladi, muxbirlikdan muharrirlikkacha bo‘lgan yo‘lni bosib o‘tdi. Ko‘pchilik u kishini o‘ziga xos ovozga ega futbol sharhlovchisi sifatida eslab qolgan. Bugungi kunda esa Zokirjon aka nafaqat jurnalistikada, balki gulchilikda ham peshqadam. Bunga uning gul plantatsiyasida bo‘lib qaytgan “Daryo” muxbiri Azizbek Abduvaliyev guvoh bo‘ldi.

“Pensiyaga tayyorgarlik nima bo‘lyapti?”

Norin tumanining Cho‘ja qishlog‘ida tug‘ilib-o‘sganman. Qishloq odami bo‘lganim bois dehqonchilikka qiziqish qonda bor, lekin bu bilan jiddiy shug‘ullanishga fursat bo‘lmasdi. Jurnalist sifatida bloknot va diktofon ko‘tarib yuraverganmiz.

Shunday kunlardan birida viloyat yo‘l-patrul xizmatining rahbari Kamolxon Aʼloxonov bir kuni “Zokirjon aka, pensiyaga ham tayyorgarlik ko‘ryapsizmi?” deb so‘rab qoldi. “Yo‘q, qanday tayyorgarlik ko‘rishim kerak?” dedim o‘smoqchilab. “Soddasiz-da, yuring men bilan” deb hovlilariga boshladi. Borsak, hamma joy bog‘, gulzor. “Siz ham shunga qiziqing, daromadi yaxshi bo‘ladi” deb maslahat berdi.

Ertasi kuni uyga ancha-muncha qalamchalarni ham tashlab ketibdi. Er-xotin qalamchalarni bir amallab ko‘kartirdik, tuvaklarga pul yo‘q. Buning imkonini topib, tuvaklarga o‘tqazib bo‘lgandan keyin issiqxona qilish zarur bo‘lib qoldi. Xullas, asta-sekin sohaning ichiga kirib, gulchi va bog‘bon bo‘lib ketdik.

“Qo‘shni davlatlardan ham kelib, olib ketishyapti”

Oldiniga 5 sotixli issiqxona qildik, faqat gul ekdik. Keyin Qoradaryo bo‘yidan 70 sotix yer olib, u yerga pavlovniya, o‘rik ko‘chatlari o‘tqazdik. Mana bu ko‘rib turganlaringiz esa bug‘doydan bo‘shagan yerlar, jami 35 sotix. Bu yerga iyulning jazirama kunlari Koreya va Eron xrizantemasini ekdik. Bular sovuq yaqinlashgani sari ochilib boraveradi. Mana, hozir rosa avjiga chiqib, gullagan payti. Xaridorlar ham oqib kelyapti.

Yaqinda Qashqadaryoga 2 mingga yaqin gul jo‘natdim. Qirg‘izistonning O‘sh va Jalolobod shaharlaridan ham kelib, olib ketishyapti. Dalamiz yo‘l ustida bo‘lgani bois ko‘zi tushgan borki, birrov bosh suqib o‘tadi.

Namanganda bir oy davom etadigan xalqaro gul festivaliga tumanlardan biri dizayner sifatida taklif qildi. Qo‘limdan kelganicha tavsiyalarni aytib, gul kompozitsiyasini tayyorlab berdim. Shu tuman festivalda g‘olib bo‘ldi. Ular xursand, meni esa quvonchimning cheki yo‘q.

“Gullarning ortidan kam bo‘lmadik”

Gulchilikning ortidan kam bo‘lmadik. Hovli-joylar qilindi, haj ziyoratlariga bordik, mashinalar oldik, nabiralarni o‘qitdik. Bir nabiram Kembrijda magistraturani tamomlash arafasida, yana biri Italiyaning Turin universitetida tahsil oldi, yana biri Andijon tibbiyot institutini tugatib, oliy ma’lumotli shifokor bo‘ldi.

Gul tirik organizm, kayfiyatni darrov sezadi. Shu bois menga qarashib yurgan o‘g‘limga ham, ekin-tikin bilan shug‘ullanadigan yordamchilarimizga ham gulxonaga doim xush kayfiyat bilan qadam bosishlarini tayinlayman. Kelgan xaridorning ko‘ngliga qaraymiz, ranjitmay jo‘natishga harakat qilamiz. Bizdan qoladigani shu aslida, chunki go‘zallik ulashuvchi insonlarmiz. Bu maqom bekorga berilmagan, uni oqlashimiz kerak.

“Hali-hanuz ovozimdan tanishadi”

Ko‘pchilik meni futbol sharhlovchisi sifatida tanidi, bildi. Radioda ishlagan yillarim o‘yinga qiziqishni bir maromda ushlab turishning o‘ziga xos usullaridan foydalanardim. Farg‘onaning “Neftchi” jamoasi keldi, qizg‘in o‘yin bo‘lyapti. Hisob 0:2, ammo imkon boricha bunga urg‘u bermaslikka harakat qilaman. “Hisob hozircha shunday” deyman, lekin kimning foydasiga ekanligini aytmayman. Nihoyat,navbatdagi gol ham urilganidan so‘ng, “farg‘onaliklar uchinchi golni ham mezbonlar darvozasiga yo‘llashdi” dedim. Bunday holatlar ko‘p bo‘lgan.

Radio-televideniyeda ishlamayotganimga 20 yil chamasi bo‘ldi, lekin muxlislar hali-hamon ovozimdan taniydi. Yaqinda Chorsu bozoridan qaytayotsam, bir kishi ortidan kelib, “Zokirjon Yigitaliyev bo‘lasizmi, adashmadimmi?” deb so‘radi. “Ha, xuddi o‘zlari” dedim. “Sizga rahmat, futbolni ham, sizni ham muxlisingiz edik, sharhlaringizni maza qilib tinglardik” deb minnatdorlik bildirdi. Boshim osmonga yetdi bunday e’tibor va e’tirofdan. Ham jurnalistikaning ortidan, ham gulchilik tufayli odamlardan rahmat eshityapman, shunga yetkazganiga shukr.