Shavkat Mirziyoyev Qarshi tumanida o‘zgarishlarni amalga oshirish uchun masʼullarga 57 ta topshiriq bergani maʼlum bo‘ldi

Prezident Shavkat Mirziyoyev Qashqadaryo viloyatiga tashrifi davomida Qarshi tumanida ham bo‘lib, tumandagi shifoxona va maktab faoliyatidan qoniqish hosil qilmagani, o‘zgarishlar qilinishi kerakligini aytgani haqida xabar berilgandi. Qarshi tumanining yangi hokimi Zoir Aliqulov tashrif davomida prezidentning 57 ta topshirig‘ini yozib olib, shu ishlarni bajarishga kirishganini maʼlum qildi.

Muhtaram prezidentimiz ishonchlarini oqlash uchun kerak bo‘lsa, 24 soat davomida to‘rtta sektor boshini birlashtirib, ular bilan birgalikda ishlaymiz. Mahalladagi yettilik, har bir tashkilot boshini qovushtirib ishlaymiz. Oqsoqolldarimizdan duo olib, deputatlarimiz bilan ham birga ishlaymiz, — deydi lavozimiga kirishgan Zoir Aliqulov.

Tuman hokimining qo‘shimcha qilishicha, prezident tumanda amalga oshirilishi kerak bo‘lgan ishlar haqida aytib, masʼullarga 57 ta topshiriq bergan.

Kecha muhtaram prezidentimizning 57 ta topshiriqlarini yozib oldim. Eng asosiysi, xalq manfaati va ishonchi, davlat manfaati uchun qilinishi kerak bo‘lgan har bir topshiriq biz uchun eng muhim, hamma narsadan ustun bo‘ladi, — deydi tumanning yangi hokimi.

Eslatib o‘tamiz, Qarshi tumanida ish boshlagan Zoir Aliqulov viloyatning Dehqonobod tumanida 2016-yildan beri rahbarlik qilib kelayotgandi.