Farg‘ona viloyatida tamaki mahsulotlarining noqonuniy olib kirilishiga chek qo‘yildi, deb xabar beradi viloyat bojxona boshqarmasi matbuot xizmati.
Qayd etilishicha, Farg‘ona viloyati bojxona boshqarmasi Kontrabandaga qarshi kurashish bo‘limi xodimlari tomonidan olingan maʼlumot asosida Qo‘qon shahrida tamaki mahsulotlarining noqonuniy olib kirilishi va aylanishiga chek qo‘yishga qaratilgan navbatdagi tezkor tadbir o‘tkazilgan. Tadbir davomida ushbu shahar hududida harakatlanayotgan fuqaro boshqaruvidagi Lacetti rusumli avtotransport vositasi belgilangan tartibda to‘xtatilib, xolislar ishtirokida ko‘zdan kechirilgan.
Natijada, avtomashinaning saloni va yukxonasiga xorijda ishlab chiqarilgan va aksiz markalari bilan markalanmagan dastlabki umumiy qiymati 70 million so‘mlik ikki turdagi jami 7 ming quti tamaki mahsulotlari borligi aniqlandi.
Hozirda mazkur holat yuzasidan tergovga qadar tekshiruv harakatlari olib borilmoqda.
Oktyabr boshlarida Surxondaryo viloyati bojxona boshqarmasi xodimlari “Boldir” temiryo‘l chegara bojxona postiga qo‘shni davlatdan noqonuniy kirib kelgan qiymati 15 milliard so‘m bo‘lgan salkam bir million quti noqonuniy sigaretalarni to‘xtatib qolgandi.
Izoh (0)