Surxondaryo viloyati bojxona boshqarmasi xodimlari “Boldir” temiryo‘l chegara bojxona postiga qo‘shni davlatdan kirib kelgan sal kam 13 milliard so‘m miqdoridagi noqonuniy sigaretlarni to‘xtatib qoldi. Bu haqda “Daryo”ga boshqarma axborot xizmati rahbari Shohruz O‘ralov xabar berdi.
Ta’kidlanishicha, bojxona organlari tomonidan tamaki mahsulotlarining noqonuniy aylanmasiga qarshi tizimli tarzda kurash olib borilmoqda.
Bojxona boshqarmasi xodimlari “Boldir” temiryo‘l chegara bojxona postiga qo‘shni davlatdan kirib kelgan temiryo‘l poyezdi tarkibidagi vagonlardan birini belgilangan tartibda bojxona nazoratidan o‘tkazdi. Ushbu vagonda yuk kuzatuv hujjatlarida ko‘rsatilmagan, aksiz markalari mavjud bo‘lmagan va bojxona nazoratidan yashirilgan umumiy qiymati 12 milliard 771 million so‘mlik 851 460 quti “Yesse Change” nomli sigaret mahsulotlari borligi aniqlandi, — deydi mas’ul.
Qayd etilishicha, hozirda mazkur holat yuzasidan bojxona organlari tomonidan tekshiruv harakatlari olib borilmoqda.
Izoh (0)