Bugun, 31-oktyabr kuni jinoyat ishlari bo‘yicha Farg‘ona tuman sudida Jinoyat kodeksining 139-moddasi (tuhmat) 2-qismi “a”, 3-qismi “a” bandi, 140-moddasi (haqorat qilish) 3-qismi “a” bandi va 165-moddasi (tovlamachilik) 3-qismi “a”, “b” bandlarida nazarda tutilgan jinoyatlarni sodir etganlikda ayblanayotgan Olimjon Haydarov (1989-yilda Rossiya Federatsiyasida tug‘ilgan, bloger, muqaddam sudlanmagan)ga oid jinoyat ishini ko‘rib chiqish bo‘yicha ochiq sud jarayoni boshlandi.
Oliy sudning Jamoatchilik bilan aloqalar markazi rahbari Aziz Abidovning ma’lum qilishicha, ushbu jinoyat ishi jinoyat ishlari bo‘yicha Farg‘ona tuman sudining raisi A.Ergashev raisligida ko‘rib chiqilmoqda.
“Sud majlisi ochiq deb eʼlon qilingach, dastlab sudlanuvchining himoyachisi tomonidan sud jarayoni mobaynida audio va videoyozuvni amalga oshirish haqidagi iltimosnomasi yuzasidan taraflar fikri tinglandi. Jinoyat ishi doirasidagi jabrlanuvchilarning shaxsiga doir maʼlumotlar ommaga oshkor etilishini xohlamasligi bois iltimosnomani rad qilish haqidagi fikrlari inobatga olinib, sud sudlanuvchining himoyachisi keltirgan iltimosnomani rad qilish haqida ajrim chiqardi.
Shu o‘rinda taʼkidlash joizki, mazkur jinoyat ishi ochiq sud majlisida ko‘rilayotgani bois jamoatchilik va ommaviy axborot vositalari vakillari unda kuzatuvchi sifatida ishtirok etishlari mumkin.
Sud jarayoni davom etmoqda. Qo‘shimcha maʼlumot sud jarayoni yakuni bo‘yicha beriladi”, — deb yozdi Aziz Abidov Telegram kanalida.
Joriy yilning 29-iyul kuni Farg‘ona viloyati huquq-tartibot organlari tomonidan o‘tkazilgan tezkor tadbir jarayonida, o‘zini mustaqil bloger deb tanishtirgan fuqaro Olimjon Haydarov tovlamachilik ustida qo‘lga olingani haqida xabar berilgandi.
“U joriy yilning 12-iyun kuni ‘Qo‘qon Istiqlol’ savdo kompleksida norasmiy savdo faoliyati bilan shug‘ullangan tadbirkorlarning ishonchiga kirgan. Fuqaro ularda norozilik kayfiyatini uyg‘otish orqali savdo komplekslaridagi rekonstruksiya ishlari bo‘yicha salbiy mazmundagi maqolalarni o‘ziga tegishli ijtimoiy tarmoq kanallariga joylashtirgan.
Qo‘shimcha ravishda, bloger ‘Qo‘qon Istiqlol’ savdo kompleksi MCHJ rasmiylaridan tovlamachilik yo‘li bilan moddiy mablag‘ undirishga uringan. O‘zi tomonidan tayyorlangan ‘Qo‘qonda huquqiy demokratik boshqaruvmi yoki shar’iy boshqaruvmi?’ nomli salbiy mazmundagi maqolani internet tarmoqlarida tarqatmaslik evaziga 10 ming AQSH dollarini tovlamachilik yo‘li bilan talab qilgan. Bloger umumiy qiymatda 7,5 ming AQSH dollarni qo‘lga kiritib, qo‘shimcha 2,500 AQSH dollarini olayotgan vaqtida tezkor tadbir vakillari tomonidan qo‘lga olingan”, — deya xabar bergan Farg‘ona IIB.
Izoh (0)