Surxondaryo viloyati bojxona boshqarmasi xodimlari “Boldir” temiryo‘l chegara bojxona postiga qo‘shni davlatdan noqonuniy kirib kelgan qiymati 15 milliard so‘m bo‘lgan salkam bir million quti noqonuniy sigaretalarni to‘xtatib qoldi. Bu haqda “Daryo”ga boshqarma axborot xizmati rahbari Shohruz O‘rolov xabar berdi. 

Aytilishicha, bu holat temiryo‘l poyezdi tarkibidagi vagonlardan biri belgilangan tartibda bojxona nazoratidan o‘tkazilgan paytda fosh bo‘lgan. 

Natijada ushbu vagonda yuk kuzatuv hujjatlarida ko‘rsatilmagan, aksiz markalari mavjud bo‘lmagan va bojxona nazoratidan yashirilgan umumiy qiymati 15 milliard so‘mlik 999 956 quti “Milano” nomli sigareta mahsulotlari borligi aniqlandi. Hozirda mazkur holat yuzasidan bojxona organlari tomonidan tekshiruv harakatlari olib borilmoqda, — deydi mas’ul.

Qo‘shimcha qilinishicha, o‘tgan oyda ham aynan shu bojxona posti orqali olib o‘tilayotgan 12,7 milliard so‘mlik 851 ming quti noqonuniy tamaki mahsuloti to‘xtatib qolingan.