Oliy Majlis Senatining 27-oktyabr kuni bo‘lib o‘tgan qirq oltinchi yalpi majlisida “Yo‘l harakati to‘g‘risida”gi qonun ko‘rib chiqilib, ma’qullandi.
Senat matbuot xizmatining xabar qilishicha, qonun bilan yo‘l egasining huquq va majburiyatlari, transport vositalari egalarining yo‘l harakati xavfsizligini taʼminlashga doir majburiyatlari hamda mehnat shartnomasi bo‘yicha ishlayotgan haydovchilarning huquqlari alohida moddalar bilan belgilanmoqda.
Senatorlar yo‘lning taʼmirlash ishlari olib borilayotgan uchastkalarida yo‘l harakatini tashkil etish masalalariga ham alohida eʼtibor qaratdi. Xususan, qonunga ko‘ra, yo‘l uchastkalarini rekonstruksiya qilish, kapital taʼmirlash yoki taʼmirlash bo‘yicha ishlar bajarilayotganda yo‘lning mazkur uchastkalaridagi qatnov qismining ko‘pi bilan 50 foizi o‘tish uchun cheklanishi yoki yopilishi mumkin. Yo‘l uchastkalarida qatnov qismining 50 foizidan ko‘prog‘ini yopish zarur bo‘lgan taqdirda mazkur yo‘l uchastkalarini aylanib o‘tish taʼminlanishi kerak.
Qonun bilan ko‘p kvartirali uylarga tutash hududlarning belgilangan chegaralarida to‘xtab turish joylarini qurish to‘g‘risidagi qarorlar hududni rejalashtirish bo‘yicha tasdiqlangan hujjatlarga muvofiq mahalliy davlat hokimiyati organlari tomonidan qabul qilinishi belgilanmoqda. Bunda qurilish ishlari shaharsozlik normalari va qoidalarida belgilangan tartibda amalga oshiriladi. To‘xtab turish joylarini joylashtirish ekologik xavfsizlikni taʼminlash hamda atrof-muhitga, aholining sog‘lig‘i va osoyishtaligiga salbiy taʼsirni kamaytirish hisobga olingan holda amalga oshirilishi qayd etilmoqda.
Qonun bilan elektr dvigatelda ishlaydigan transport vositalari uchun alohida joylar ajratilishi va bunday joylarda elektr quvvat manbalariga ulanish imkoniyati yaratilishi mumkinligi belgilanmoqda.
Shuningdek, qonunda pulli to‘xtab turish joylariga doir talablar, pulli to‘xtab turish joylari egalarining huquq va majburiyatlari ham alohida modda bilan belgilanmoqda.
Majlisda yo‘l harakati ishtirokchilarining huquq va majburiyatlariga alohida urg‘u berilib, qonunda transport vositalarini boshqarish huquqini beruvchi normalar hamda haydovchilarni tayyorlashga doir talablar belgilanayotganligi, transport vositalarini boshqarish huquqi qaysi hollarda bekor qilinishi mumkinligi ko‘rsatib o‘tilganligi qayd etildi.
“Sohaning ilmiylik, ochiqlik va oshkoralik, ekologik xavfsizlikning ustuvorligi kabi yangi prinsiplari mustahkamlab qo‘yilmoqda. Masʼul davlat organlarining vakolatlari kengaytirilmoqda. Korxona, tashkilot, muassasalar va eʼtiborlisi, fuqarolarning ham yo‘l harakati sohasidagi tadbirlarni amalga oshirishdagi ishtiroki belgilab berilmoqda”, — dedi Senat raisi Tanzila Norboyeva ushbu qonun haqida.
Taʼkidlanishicha, mazkur qonun yo‘llarda fuqarolar xavfsizligini taʼminlash, yo‘l harakatini to‘g‘ri va tizimli yo‘lga qo‘yish, mutasaddi organlar o‘rtasida samarali hamkorlikni joriy qilish, shuningdek, yo‘l harakati ishtirokchilarining huquq va manfaatlarini himoya qilishga xizmat qiladi.
Izoh (0)