O‘zbekistonda onlayn auksion orqali “chiroyli” deya taʼrif beriladigan avtoraqamlar qimmat narxlarda sotilishda davom etmoqda. Masalan, hozir sotuvda turgan avtoraqamlardan birining boshlang‘ich narxi 165 million so‘m. Bu deyarli bitta Cobalt avtomobilining bozordagi narxiga teng.
Onlayn auksionga 24-oktyabr kuni chiqarilgan 80 X 777 XX davlat raqamining boshlang‘ich narxi 165 million so‘m qilib belgilangan. Keyingi eng yaxshi narx uchun esa 170 million so‘m so‘ralmoqda. Ro‘yxatga olish manzili Buxoro viloyatida ekani qayd etilgan raqam auksionda qancha narxga sotilishi hozircha nomaʼlum. Balki bu ham yaqinda qariyb 893 million so‘mga (73 ming dollar) sotilgan 01 777 RRR avtoraqami kabi 5 ta Cobaltning narxiga sotilar.
Buyurtma raqamlar rukni ostida sotuvga chiqarilgan yana bir 75 Z 222 ZZ avtoraqamining boshlang‘ich narxi ham 165 million so‘m.
Ro‘yxatga olish manzili Surxondaryo viloyati deb ko‘rsatilgan navbatdagi 75 O 007 OO avtoraqami ham xuddi shu boshlang‘ich narx bilan sotuvga chiqarilgan.
“Shuning uchun ham ushbu davlat raqam belgilarining boshlang‘ich narxi 165 million so‘m. Yaʼni bitta yangi Cobaltning narxi. Yashavor! “O 000 OO” davlat raqam belgisi chiqsa, bitta samolyot narxi bo‘lsa kerak a”,—deya munosabat bildirilgan kanalda.
Avvalroq O‘zbekistonning turli hududlarida faoliyat olib boruvchi “Korzinka.uz” supermarketlar tarmog‘i asoschisi va rahbari Zafar Hoshimov bitta avtoraqam salkam 600 million so‘mga sotilganiga munosabat bildirgandi.
“Shaxsan men hech qachon na telefon va na avtoulovda “chiroyli” nomerga egalik qilishga qiziqmaganman. Aksincha, menga desa, bunday raqamlar qancha odamlar esida kam qolsa, egasiga shuncha yaxshi. Lekin shu borada o‘sha nomerni davlat tomonidan sotilishi va kimdir uni rasman shunday pulga olishini yomonlamayman. Bir tomondan, avval ham shunday “blatnoy” nomerlar norasman sotilgan yoki “sendan ugina, mendan bugina” yo‘sinida taqsimlangan, faqat davlatga, elga undan hech qanday naf bo‘lmagan. Hozir mana yarim milliarddan ortiq pul naqd davlat g‘aznasiga tushdi. Umid qilamiz, In Shaa Alloh, bu mablag‘da o‘sha hamma tanqid qiluvchilar jon kuydirayotgan yetimlaru-kambag‘allarning ham ulushi bor. Ikkinchi tomondan, shunaqa nomerni havas qiladigan odam ishtiyoqi shu qadar baland ekan, yaxshiyamki u pulini nomerni pora berib olish o‘rniga yoki boshqa har xil bexuda orzu xavas o‘rniga to‘laligicha davlat hisobiga tushirdi. Pul egasi ham o‘zi, uni ishlatishi ham o‘zining ishi va bu kabi ishlatish natijasida foyda el hisobiga kelgani uchun, uni toza isrof deyishga tilim qayrilmayapti. Qaniydi hamma bexuda xarajatlar shu kabi to‘la davlat hisobiga tushsa edi, byudjet to‘lib, soliqlar ham qisqararmidi... Yana aytib o‘tay, nomer egasiga hech qanday aloqam yo‘q”,—deb yozgan tadbirkor.
Eslatib o‘tamiz, 2022-yilning 6-may kuni 50 777 ZZZ avtoraqami qariyb 669 million 600 ming so‘mga sotilgandi. Bu Markaziy bank tomonidan o‘sha paytda belgilangan dollar kursi (11 132,56 so‘m) bo‘yicha 60 ming dollardan ortiqni tashkil etgan.
Izoh (0)