O‘zbekistonda ko‘p kvartirali uylarga tutash hududlarda to‘xtab turish joylarini qurish rejalashtirilmoqda. Bu haqda Senatning Yoshlar, madaniyat va sport masalalari qo‘mitasi majlisida ma’lum qilindi.
Majlisda Senatning navbatdagi yalpi majlisida muhokama qilinishi rejalashtirilayotgan masalalar ko‘rib chiqilgan. Xususan, “Yo‘l harakati to‘g‘risida”gi qonun shular jumlasidan.
Ta’kidlanishicha, so‘nggi paytlarda yo‘l-transport hodisasi oqibatida ko‘plab insonlar qurbon bo‘layotgani sohani tartibga soluvchi amaldagi qonunga tegishli o‘zgartirishlar kiritishni hamda uni yanada takomillashtirishni taqozo etmoqda. Shu maqsadda “Yo‘l harakati to‘g‘risida”gi qonunning yangi tahriri ishlab chiqilgan.
“Qonundagi eng muhim yangiliklardan biri ko‘p kvartirali uylarga tutash hududlarda to‘xtab turish joylarini qurish va atrof muhit, aholining sog‘lig‘i va osoyishtaligiga transport vositalarining salbiy ta’sirini kamaytirish nazarda tutilmoqda”, — deyiladi Senat xabarida.
Xabarda ushbu to‘xtab turish joylari uchun maydonlar qanday ajratilishi, u pullik yo bepul bo‘lishiga aniqlik kiritilmagan.
Qayd etilishicha, mazkur qonun yo‘llarda fuqarolar xavfsizligini taʼminlash, yo‘l harakatini to‘g‘ri va tizimli yo‘lga qo‘yish, mutasaddi organlar o‘rtasida samarali hamkorlikni joriy qilish, shuningdek, yo‘l harakati ishtirokchilarining huquq va manfaatlarini himoya qilishga xizmat qiladi.
Shavkat Mirziyoyev 20-okytabr kuni bo‘lib o‘tgan videoselektor yig‘ilishida yo‘llardagi harakat xavfsizligi bilan bog‘liq vaziyat ancha ayanchli ahvolda ekanini ko‘rsatib o‘tgandi. Prezident yo‘l-transport hodisalari oqibatida o‘lim va jarohatlanish holatlari ko‘pligini, tegishli rahbarlar bunga loqayd bo‘lib o‘tirganini jiddiy tanqid qilgandi.
Izoh (0)