“Tezlikni cheklab, qo‘shimcha fotoradarlar o‘rnatilsagina, bosar-tusarini bilmaydigan ‘lixach’larimizni tarbiyalasak bo‘ladi” — Odiljon Tojiyev

Oliy Majlis Qonunchilik palatasi spikeri o‘rinbosari Odiljon Tojiyev yo‘l qoidalarini buzganlik uchun jazolarni keskin kuchaytirish kerakligini aytdi.

Deputatning ta’kidlashicha, yo‘llardagi mudhish voqealar bugungi hayot voqeligiga aylanib ulgurdi. Jamiyatda sinizm deb atalmish fenomen keng tomir otmoqda. Qoidabuzarlik uchun jazoning muqarrarligi hal qiluvchi ahamiyatga ega bo‘lyapti.

Mana, misol uchun, poytaxtimizda radarlar va svetoforlar o‘rnatilgan ko‘chalarda YTHlarning keskin kamaygani qayd etilyapti. Menimcha, mamlakatimiz bo‘ylab haqiqiy, xalqaro meʼyorlardagi avtostradalar qurilgunigacha hozirgi magistral yo‘llarimizda tezlikni 80, 90 kilometr/soatgacha cheklab, qo‘shimcha fotoradarlar o‘rnatilsagina bosar-tusarini bilmaydigan “lixach”larimizni tarbiyalasak bo‘ladi. Ular to‘laydigan jarimalarni ham dadil, qo‘rqmasdan bir necha karra ko‘tarsak, xalqimiz bunday qarorlarni faqat olqishlagan bo‘lardi, nazarimda 

“Xalqimiz” tushunchasiga qonun-qoidaga itoatkor haydovchilarimizni ham qo‘shgan bo‘lardim. Negaki, “o‘pkasi shishgan shumaxerlar”dan, bir narsadan quruq qolayotgandek orqadan taqab keladigan “taʼqibchilar”dan ular ham bezor”,  — deydi Odiljon Tojiyev.

Uning ta’kidlashicha, insoniyat tarixi shuni o‘rgatadiki, odamlar umumiy qoida va qonunlarni nazar-pisand qilmay qo‘ysa, qonunbuzarlik uchun jazolarni keskin kuchaytirishgina samara bergan. Ayniqsa, qonun, qonun ustuvorligi, qonunga itoat madaniyati endi-endi shakllanib kelayotgan jamiyatlarda.

Bir so‘z bilan aytganda, yo‘llarimizdagi boshboshdoqlikka chek qo‘yish, odamlar hayotiga zomin bo‘layotgan YTHlarga barham berishni ko‘zlab, yo‘l harakati qoidalarini buzganlik uchun jazolarni keskin kuchaytirsak, jazoning esa muqarrarligini (zamonaviy texnik vositalar yordamida) qatʼiy taʼminlasak, maqsadga muvofiq bo‘lar edi, — dedi Odiljon Tojiyev.