Insoniyat taraqqiyotning yangi bosqichiga qadam bosar ekan, sanʼatning yangi turlarini kashf etmoqda. Chunki sanʼat har doim zamon ruhini o‘zida oynadek aks ettirgan. Yangi texnologik yutuqlarning sanʼatga ham kirib kelishi insonlarga o‘tmish va kelajak, hayot va xayol o‘rtasidagi bo‘shliqni to‘ldirishga imkon yaratmoqda.
Masalan, sunʼiy intellekt yordamida yaratilayotgan tarixiy video yoki surat sizni o‘sha davrga bevosita olib kirib ketadi. Siz o‘zingizda tarix ruhiyatini his etasiz va bevosita voqelik ishtirokchisiga aylanasiz.
Telegram messenjerida “Boburnoma” nomli kanal mavjud bo‘lib, unda O‘zbekiston tarixida o‘tgan shaxslarning qiyofasi sunʼiy intellekt yordamida yaratilib, o‘quvchilarga taqdim etib borilmoqda.
Sunʼiy intellekt yordamida ushbu suratlarni yasayotgan bloger Hikmatilla Ubaydullayev biz bilan suhbatlashar ekan, bu g‘oya unga qanday qilib kelib qolgani, kelajakdagi rejalari haqida gapirib berdi.
– Dastlab, tarixiy obrazlarni sunʼiy intellekt yordamida yaratish g‘oyasi sizga qachon keldi va bu ishga nima uchun qo‘l urdingiz?
– O‘zim tarix faniga qiziqqanim bois tariximizda o‘tgan shaxslarning suratlarini sunʼiy intellekt yordamida yaratishga harakat qildim. Zahiriddin Muhammad Boburning “Boburnoma” asarini o‘qib chiqib, juda taʼsirlandim. Kitobni o‘qiyotganimda har bir taʼrifning go‘zalligi va tafsilotiga hayron bo‘ldim. Bu kitob o‘tmishga ochilgan oyna edi. Men undagi matnlar asosida voqeliklarni va shaxslarni qanday ko‘rinishda bo‘lganiga qizib qoldim va obrazlarni yaratishga kirishib ketdim.
– Siz bu suratlarni yaratish orqali nimani maqsad qildingiz?
– Mening asosiy maqsadim – yoshlarni sunʼiy intellekt yordamida yaratilgan sanʼat asarlari orqali o‘z tarixlariga qiziqtirish. Hozirda jadid bobolarimizni tasvirlashga harakat qilyapman. Bundan keyin O‘zbekiston tarixida o‘tgan har bir hukmdorning ko‘rinishini yaratmoqchiman.
– Yaratgan jadidlar haqidagi suratlaringiz qanchalik o‘sha davrga mos kelishini qanday bilasiz?
– Men uchun har bir portret jadidlar yashagan davr ruhiga mos bo‘lishi muhim. Men ularning nafaqat tashqi qiyofasini, balki ruhiy holatini, orzu va g‘oyalarini ham yetkazishga harakat qildim. Har bir portret ularning dunyosiga qanchalik chuqur sho‘ng‘ib ketganim va bu loyihada qanchalik ishtirok etganimdan dalolat beradi.
– Ushbu texnologiyalarning kelajagini qanday ko‘rasiz?
– O‘ylaymanki, bu texnologiyalar yanada aniq va moslashuvchan bo‘lib, sanʼatning yangi turlariga yo‘l ochadi. Ammo bu bilan yangi axloqiy meʼyorlar va foydalanish qoidalariga ehtiyoj paydo bo‘ladi.
Sunʼiy intellekt yordamida tasvirlangan yangi suratlarni ushbu havola (https://t.me/boburnama) orqali kirib ko‘rishingiz mumkin.
Izoh (0)