Farg‘ona viloyatining Uchko‘prik tumanida ikki nafar davlat xizmatchisi qarta o‘ynagani uchun lavozimidan ozod etilgani haqida xabar berilgan edi. Davlat xizmatini rivojlantirish agentligining maʼlum qilishicha, holat yuzasidan agentlikning Farg‘ona viloyati filiali o‘rganish ishlarini boshlagan.
“Masala tashkilotlar qoshidagi odob-axloq komissiyasida muhokama qilindi. Ayni damda har ikkala masʼul shaxsning davlat xizmatida faoliyat yuritmayotganini maʼlum qilamiz. Shuningdek, holat yuzasidan Uchko‘prik tumani IIB tomonidan surishtiruv ishlari boshlangan”, — deyiladi agentlik axborotida.
Qo‘shimcha qilinishicha, ayni kunlarda davlat xizmatchilari orasida Davlat fuqarolik xizmatchilari odob-axloqining namunaviy qoidalari yuzasidan qo‘shimcha tushuntirish ishlari olib borilmoqda.
Agentlik axborotida rasm qayerda olingani va suratda ko‘ringan davlat xizmatchilaridan tashqari yana kimlar qarta o‘ynida ishtirok etganiga oydinlik kiritilmagan.
Qarta o‘ynayotgani aks etgan rasmdagi ikki davlat mulozimi: Uchko‘prik tumani kambag‘allikni qisqartishirish va bandlik bo‘limi boshlig‘i o‘rinbosari Dilshodbek Daliyev va tuman iqtisodiyot va moliya bo‘limi boshlig‘i Sirojiddin Rahmonaliyev bilan tuzilgan mehnat shartnomasi bekor qilingan.
Izoh (0)