O‘zbekiston hududlarida o‘rtacha oylik ish haqi qanchaligi ma’lum qilindi

O‘zbekistonda korxona va tashkilotlarda ishlovchi xodimlarning o‘rtacha oylik ish haqi 4,4 million so‘mni tashkil etdi. Bu haqda Statistika agentligi ma’lumotlarida keltirildi.

Unga ko‘ra, 2023-yilning yanvar—sentyabr oylarida qayd etilgan mazkur ko‘rsatkich o‘tgan yilning mos davriga nisbatan 18,1 foizga oshgan.

Hududlar bo‘yicha eng yuqori ko‘rsatkich Toshkent shahrida kuzatildi — qariyb 7,2 million so‘m. Undan keyingi o‘rinlarni Navoiy (5,7 million so‘m) va Toshkent viloyatlari (4,4 million so‘m) egalladi.

Eng kam o‘rtacha oylik ish haqi Qashqadaryo viloyatiga to‘g‘ri keladi — 3,2 million so‘m. Samarqand, Surxondaryo, Farg‘ona hamda Namangan viloyatlarida ham past ko‘rsatkich kuzatilgan.

Hududlar kesimida o‘rtacha oylik ish haqi quyidagicha:

• Toshkent shahri — 7 186 900;
• Navoiy viloyati — 5 750 300;
• Toshkent viloyati — 4 419 200;
• Andijon viloyati — 3 850 400;
• Buxoro viloyati — 3 785 800;
• Xorazm viloyati — 3 649 300;
• Qoraqalpog‘iston Respublikasi — 3 638 200;
• Sirdaryo viloyati — 3 533 600;
• Jizzax viloyati — 3 388 400;
• Farg‘ona viloyati — 3 340 400;
• Surxondaryo viloyati — 3 314 200;
• Samarqand viloyati — 3 298 900;
• Namangan viloyati — 3 258 800;
• Qashqadaryo viloyati — 3 200 800.

2023-yil yanvar—sentyabr oylarida iqtisodiy faoliyat turlari bo‘yicha o‘rtacha oylik ish haqining eng baland ko‘rsatkichi moliya va sug‘urta sohasiga to‘g‘ri kelib, 12,7 million so‘mni tashkil etdi. Axborot va aloqa sohasi 10,3 million so‘mni, tashish va saqlash sohasi 6,7 million so‘m va sanoat sohasi 5,4 million so‘mni tashkil etib, o‘rtacha oylik ish haqiga nisbatan yuqori ko‘rsatkichni tashkil qildi. Ta’lim (3 million so‘m) hamda sog‘liqni saqlash va ijtimoiy xizmatlar ko‘rsatish (2,9 million so‘m) sohalari esa boshqa sohalarga nisbatan eng quyi pog‘onalarda qayd etildi.

O‘rtacha oylik ish haqini hisoblashda jami 3 080 888 nafar xodim ma’lumotlaridan foydalanilgan.