Инсоният тараққиётнинг янги босқичига қадам босар экан, санъатнинг янги турларини кашф этмоқда. Чунки санъат ҳар доим замон руҳини ўзида ойнадек акс эттирган. Янги технологик ютуқларнинг санъатга ҳам кириб келиши инсонларга ўтмиш ва келажак, ҳаёт ва хаёл ўртасидаги бўшлиқни тўлдиришга имкон яратмоқда.
Масалан, сунъий интеллект ёрдамида яратилаётган тарихий видео ёки сурат сизни ўша даврга бевосита олиб кириб кетади. Сиз ўзингизда тарих руҳиятини ҳис этасиз ва бевосита воқелик иштирокчисига айланасиз.
Telegram мессенжерида “Бобурнома” номли канал мавжуд бўлиб, унда Ўзбекистон тарихида ўтган шахсларнинг қиёфаси сунъий интеллект ёрдамида яратилиб, ўқувчиларга тақдим этиб борилмоқда.
Сунъий интеллект ёрдамида ушбу суратларни ясаётган блогер Ҳикматилла Убайдуллаев биз билан суҳбатлашар экан, бу ғоя унга қандай қилиб келиб қолгани, келажакдаги режалари ҳақида гапириб берди.
– Дастлаб, тарихий образларни сунъий интеллект ёрдамида яратиш ғояси сизга қачон келди ва бу ишга нима учун қўл урдингиз?
– Ўзим тарих фанига қизиққаним боис тарихимизда ўтган шахсларнинг суратларини сунъий интеллект ёрдамида яратишга ҳаракат қилдим. Заҳириддин Муҳаммад Бобурнинг “Бобурнома” асарини ўқиб чиқиб, жуда таъсирландим. Китобни ўқиётганимда ҳар бир таърифнинг гўзаллиги ва тафсилотига ҳайрон бўлдим. Бу китоб ўтмишга очилган ойна эди. Мен ундаги матнлар асосида воқеликларни ва шахсларни қандай кўринишда бўлганига қизиб қолдим ва образларни яратишга киришиб кетдим.
– Сиз бу суратларни яратиш орқали нимани мақсад қилдингиз?
– Менинг асосий мақсадим – ёшларни сунъий интеллект ёрдамида яратилган санъат асарлари орқали ўз тарихларига қизиқтириш. Ҳозирда жадид боболаримизни тасвирлашга ҳаракат қиляпман. Бундан кейин Ўзбекистон тарихида ўтган ҳар бир ҳукмдорнинг кўринишини яратмоқчиман.
– Яратган жадидлар ҳақидаги суратларингиз қанчалик ўша даврга мос келишини қандай биласиз?
– Мен учун ҳар бир портрет жадидлар яшаган давр руҳига мос бўлиши муҳим. Мен уларнинг нафақат ташқи қиёфасини, балки руҳий ҳолатини, орзу ва ғояларини ҳам етказишга ҳаракат қилдим. Ҳар бир портрет уларнинг дунёсига қанчалик чуқур шўнғиб кетганим ва бу лойиҳада қанчалик иштирок этганимдан далолат беради.
– Ушбу технологияларнинг келажагини қандай кўрасиз?
– Ўйлайманки, бу технологиялар янада аниқ ва мослашувчан бўлиб, санъатнинг янги турларига йўл очади. Аммо бу билан янги ахлоқий меъёрлар ва фойдаланиш қоидаларига эҳтиёж пайдо бўлади.
Сунъий интеллект ёрдамида тасвирланган янги суратларни ушбу ҳавола (https://t.mе/boburnama) орқали кириб кўришингиз мумкин.
Изоҳ (0)