Qashqadaryo viloyatining Dehqonobod tumani hokimi Zoir Aliqulov OAV vakillari bilan uchrashuvda ayni kunda tuman hokimlarida ishlash uchun barcha imkoniyatlar borligini, hokimlar tashabbusi to‘g‘ri va xalq uchun manfaatli bo‘lsa shaxsan davlat rahbari tomonidan qo‘llab-quvvatlanayotganini bildirdi. Bu haqda “Daryo”ga tuman hokimligi axborot xizmati xabar berdi.
Ta’kidlanishicha, bugun Qarshi shahridagi Jurnalistlar uyida Dehqonobod hokimi Zoir Aliqulovning jurnalistlar va blogerlar uchun navbatdagi matbuot anjumani bo‘lib o‘tgan.
Unda so‘z olgan tuman hokimi hudud iqtisodiyotiga investitsiyalar jalb qilish va tumanda aholi daromadlarini yanada oshirish bo‘yicha amalga oshirilayotgan loyihalar xususida ma’lumot bergan. Shuningdek, hokim jurnalist va blogerlarni qiziqtirgan savollarga javob qaytargan.
Tan olish kerak, 2016-yil tumanda hokim sifatida ish boshlagan paytimda tumanda biror bir yangilik, o‘zgarish qilish uchun imkoniyatlarimiz ancha cheklangan edi. Mablag‘ borasida muammolarimiz bor edi. Hozir esa imkoniyatlarimiz judayam keng. Tuman hokimi sifatida biror bir tashabbusni ilgari sursak tashabbus xalqqa manfaat keltiradigan bo‘lsa buni shaxsan muhtaram prezidentimizning o‘zlari qo‘llab-quvvatlamoqda. Va kerakli mablag‘ni ham bermoqda. Bunday vaziyatda bizdan faqat ishlash va berilgan mablag‘larni o‘z o‘rnida ishlatish so‘raladi, — dedi tuman hokimi Zoir Aliqulov.
Tuman rahbari matbuot anjumanida shuningdek, Oqsuv—Dehqonobod loyihasi, tumanda aholini band qilishi ko‘zda tutilgan pista plantatsiyasi va 500 ta yangi ish o‘rni yaratuvchi tikuvchilik fabrikasi borasidagi savollarga ham javob bergan.
Izoh (0)