“Hokimlar yelkasida katta yuk va mas’uliyat bor” — Dehqonobod hokimi hokimlik mashaqqati haqida

Qashqadaryo viloyatining Dehqonobod tumanida rahbarlik qilib kelayotgan hokim Zoir Aliqulov “Daryo” jurnalisti bilan suhbatida hokimlik mashaqqati va mas’uliyati haqida gapirdi.

Bilasizmi, hokimlar yelkasida katta yuk va mas’uliyat bor. Avval ham bu yuk og‘ir va mas’uliyatli bo‘lgan. Lekin bugun bu mas’uliyat ikki hissaga ortdi. Hurmatli prezidentimiz bilan birga Yangi O‘zbekistonni bunyod etishga kirishgan hokimlar ham bugun buni his etmoqda. Shaxsan o‘zim ham faoliyatim davomida tuman rivoji uchun bugun nimalar qilishga ulgurdim-u, nimalarga ulgurmadim deya har kuni o‘zimga o‘zim savol beraman, — deydi Dehqonobod tumani hokimi Zoir Aliqulov.

Zoir Aliqulovning ma’lumot berishicha, u Qashqadaryo viloyatining Dehqonobod tumanida 2016-yilning iyun oyidan beri hokimlik qilib keladi.

Tan olish kerak, faoliyatimiz davomida xato-kamchiliklarimiz ham bo‘ladi. Insonmiz. Ulgurmagan yoxud tugatolmagan ishlarimiz ham bor, albatta. Dehqonobodda yashovchi 150 ming nafardan ortiq aholining ko‘nglini topish mushkul. Lekin shunga qaramasdan tumanda aholining eng ko‘p murojaatlari, ishsizlik, yo‘l, ko‘priklar qurilishi, suv, uy-joy bilan ta’minlash bo‘yicha muammolarga e’tibor qaratmoqdamiz, — deydi u.

Tumanda tadbirkor Vahob Norsafarov tomonidan tashkil etilgan 367 gektar maydonda pistachilik plantatsiyasi yaratildi. Ushbu plantatsiya muhtaram prezidentimiz topshirig‘iga asosan tashkil etilishi rejalashtirilgan 2,5 ming gektarlik plantatsiyaning bir qismi hisoblanadi. Plantatsiyadan yiliga 1 million dollar daromad olinishi kutilmoqda. Asosiy ishlarimizdan biri azaldan Dehqonobod tumani aholisining orzusi bo‘lib kelgan, 2018-yilda prezidentimiz tomonidan ilgari surilgan Oqsuv-Dehqonobod loyihasining ishga tushirilishi bo‘ldi. Loyihaning birinchi bosqichi yakunlandi. Birinchi bosqichda tuman markazidan 78 km uzoqlikdagi tog‘dan toza ichimlik suvi keltirildi. Va mazkur ishlarga 226 milliard so‘m mablag‘ sarflandi. Shuningdek, ayni paytda loyihaning ikkinchi bosqichi davom etmoqda. Ikkinchi bosqichda tumanning 116 ta qishlog‘ini toza ichimlik suvi bilan ta’minlash ko‘zda tutilgan. Ayni kunga qadar tumandagi to‘rtta mahallaga suv quvurlari tortilib, toza ichimlik suvi bilan ta’minlandi.

Bundan tashqari tuman hududida yashovchi aholini arzon va sifatli uy-joy bilan ta’minlash maqsadida Dehqonobod City loyihasi boshlab yuborildi. Ushbu loyiha asosida 1036 ta xonadon egasi arzon, sifatli va barcha zamonaviy qulayliklarga ega uy-joy bilan ta’minlanadi. 1976-yilda qurilgan, so‘nggi paytlarda qarovsiz ahvolga kelib qolgan istirohat bog‘i Dehqonobod tumani aholisining talab va istaklariga binoan, 2021-yilda qayta ta’mirlandi va bog‘da amfiteatr qurildi, ko‘ngilochar attraksionlar ishga tushirildi.

Shu bilan bir qatorda, 600 ming elektron kitob fondiga ega bo‘lgan zamonaviy kutubxona barpo etildi. Mazkur kutubxona ishga tushgandan so‘ng, Dehqonobod tuman hokimligi tomonidan homiylik asosida 100 ming kitob sovg‘a qilindi. Bundan tashqari hozirgi kunda homiylar tashkilotlar tomonidan kitoblar sovg‘a qilib borilmoqda, — deydi tuman hokimi.

Zoir Aliqulovning qo‘shimcha qilishicha, tuman aholisining bandligini ta’minlash maqsadida, tashabbuskor tadbirkor tomonidan 500 ish o‘rniga ega tikuv fabrikasi qurilishi yakunlanish arafasida. Mazkur loyiha ishga tushgach, Dehqonobodda yashovchi 500 nafar aholining bandligi ta’minlanadi. Loyiha ishga tushishiga 60 mlrd so‘m mablag‘ sarflanmoqda.

Zoir Aliqulov “Dehqonobod tumani azaldan jin ko‘priklari bilan mashhur tuman, xo‘sh, aholining ko‘priklar muammosi qanday hal etilmoqda, bu borada nimalar qilindi”, degan savolga javoban tumanda 70 dan ortiq katta-kichik ko‘priklar qurilganini ma’lum qildi.

Faoliyatim davomida 70 dan ortiq katta-kichik ko‘priklar qurilishini amalga oshirdik. Tuman markazidan uzoq va sel yo‘lida aholi tomonidan hashar yo‘li bilan qurilgan jin ko‘priklarning ayrimlari imkoniyatdan kelib chiqib, zamonaviy, avtomobillar harakati uchun ham talabga javob beradigan ko‘priklarga aylantirilgan bo‘lsa, yana boshqalari esa aholining o‘ti-qaytishi uchun xavfsiz, ixcham ko‘priklarga almashtirildi”, — deydi hokim.