O‘zbekistonda 2023-yilning sakkiz oyi davomida 414 nafar fuqaroda zaharlanish holati qayd etilgan. Bu haqda Sanitariya-gigiyena boshqarmasi ovqatlanish gigiyenasi bosh mutaxassisi Abdurahmon Ismailov ma’lum qildi.
Qayd etilishicha, sakkiz oy davomida 39 ta holatda guruhli zaharlanish qayd etilib, ularda 414 nafar fuqaro jabrlangan, uch nafari vafot etgan. Jabrlanganlarning 86 nafari bolalardir. Zaharlanish holatlarining 21 tasi (53,8 foiz) botulizm, 1 tasi MTT (2,5 foiz), 13 tasi (23 foiz) ovqattoksikinfeksiyasi va 1 tasi (2,5 foiz) kimyoviy zaharlanishlarga to‘g‘ri keladi.
21 ta holatda uy sharoitida tayyorlangan konserva mahsulotlarini isteʼmol qilish oqibatida yuzaga kelgan botulizm kasalligining 3 tasi — Jizzax, 6 tasi — Samarqand va yana 6 tasi — Farg‘ona viloyatlariga to‘g‘ri keladi.
Qayd etilgan ovqatdan zaharlanish holatlarining kelib chiqishi sabablari tahlil etilganda:
- umumiy ovqatlanish obyektlari, nodavlat taʼlim muassasalari oshxonalari sanitariya qoida va meʼyorlari talablariga mos kelmagan holda faoliyat yuritayotgani;
- oshxonalarning jihozlar bilan to‘liq taʼminlanmagan va mavjudlari esa maʼnan eskirgan yoki nosoz holatda ekani;
- taom tayyorlash uchun sifati va xavfsizligi kafolatlanmagan oziq-ovqat mahsulotlari ishlatilishi;
- umumiy ovqatlanish obyektlari oshpazlarining ko‘pchiligi soha bo‘yicha o‘qimaganligi, ularning taom tayyorlash texnologiyalarini, oziq-ovqat mahsulotlarini saqlash, tashish va realizatsiya qilish qoidalarini bilmasligi aniqlangan.
Eslatib o‘tamiz, 4-avgust kuni Samarqand viloyati Urgut tumanidagi to‘yxonalarning birida 42 kishi salatdan zaharlangandi. 22-avgust kuni Samarqand shahrida 49 kishi fastfud markazida hot-dogdan zaharlangani to‘g‘risida xabar berilgandi.
Izoh (0)