Toshkent shahrining Parkent ko‘chasida joylashgan turar joy binosidagi liftda odamlar hayoti uchun xavfli bo‘lgan voqea yuz bergani xabar qilingandi.
Mazkur turar joy binosida yashovchi fuqaroning xabar qilishicha, 24-oktyabr kuni ichida odamlari bo‘lgan lift 9-qavatdan tushayotganda keskin tezlashgan, 5-qavatga yaqinlashganda esa avtomatik tormoz tizimi ishga tushgan.
Mazkur voqea Qurilish va uy-joy kommunal xo‘jaligi vazirligi nazorat inspeksiyasi, Tog‘-kon, geologiya va sanoat xavfsizligini nazorat qilish inspeksiyasi, hokimlik hamda mazkur ko‘p qavatli uylarga xizmat ko‘rsatuvchi “Uyut komfort kommunal” boshqaruv servis kompaniyasi vakillaridan tashkil topgan ishchi guruh tomonidan o‘rganildi.
Unga ko‘ra ko‘tarish qurilmasi belgilangan tartibda davlat ro‘yxatidan o‘tkazilmaganligi va foydalanishga qabul qilinmaganligi aniqlandi. Shuningdek, liftda tegishli tartibda davriy sinov ishlari amalga oshirilmagan. Mazkur liftga texnik xizmat ko‘rsatish bo‘yicha maxsus tashkilot bilan shartnoma tuzilmagan hamda liftni soz holatda saqlash, uni bexatar ishlatish bo‘yicha javobgar shaxs tayinlanmagan.
“2020-yilda ishlab chiqarilgan, ko‘tarish og‘irligi 1000 kg bo‘lgan lift qurilmasiga belgilangan tartibda texnik xizmat ko‘rsatilmaganligi sababli shaxta kabinasi eshiklarining kontaktlari bo‘shab qolgan. Ushbu lift harakatda vaqtida kimdir liftning tashqi eshiklarini qo‘l yordamida ochishga uringan. Natijada xavfsizlik moslamasi ishga tushgan va lift o‘zini-o‘zi to‘xtatish vazifasini bajara boshlagan.
O‘rganish davomida lift tushib ketmagani, aksincha tegishli xavfsizlik qurilmasi ishga tushgan holda to‘xtagani aniqlandi. Hozirda tegishli tashkilotlar tomonidan liftdagi kamchiliklarni bartaraf etish va voqea tafsilotlarini chuqur o‘rganish ishlari amalga oshirilmoqda. Hodisadan hech kim jabrlanmagan”, — deyiladi Qurilish va uy-joy kommunal xo‘jaligi vazirligi bayonotida.
“Liftlarda mana shunday holatlarning oldini olish maqsadida joriy yilning avgust oyidan boshlab, Tog‘-kon, geologiya va sanoat xavfsizligini nazorat qilish inspeksiyasi tomonidan ro‘yxatga olinmagan lift uskunalarini foydalanishga qabul qilish to‘xtatilgan”, — deya qo‘shimcha qilinadi vazirlik xabarida.
Izoh (0)