Ўзбекистонда 2023 йилнинг саккиз ойи давомида 414 нафар фуқарода заҳарланиш ҳолати қайд этилган. Бу ҳақда Санитария-гигиена бошқармаси овқатланиш гигиенаси бош мутахассиси Абдураҳмон Исмаилов маълум қилди.
Қайд этилишича, саккиз ой давомида 39 та ҳолатда гуруҳли заҳарланиш қайд этилиб, уларда 414 нафар фуқаро жабрланган, уч нафари вафот этган. Жабрланганларнинг 86 нафари болалардир. Заҳарланиш ҳолатларининг 21 таси (53,8 фоиз) ботулизм, 1 таси МТТ (2,5 фоиз), 13 таси (23 фоиз) овқаттоксикинфекцияси ва 1 таси (2,5 фоиз) кимёвий заҳарланишларга тўғри келади.
21 та ҳолатда уй шароитида тайёрланган консерва маҳсулотларини истеъмол қилиш оқибатида юзага келган ботулизм касаллигининг 3 таси — Жиззах, 6 таси — Самарқанд ва яна 6 таси — Фарғона вилоятларига тўғри келади.
Қайд этилган овқатдан заҳарланиш ҳолатларининг келиб чиқиши сабаблари таҳлил этилганда:
- умумий овқатланиш объектлари, нодавлат таълим муассасалари ошхоналари санитария қоида ва меъёрлари талабларига мос келмаган ҳолда фаолият юритаётгани;
- ошхоналарнинг жиҳозлар билан тўлиқ таъминланмаган ва мавжудлари эса маънан эскирган ёки носоз ҳолатда экани;
- таом тайёрлаш учун сифати ва хавфсизлиги кафолатланмаган озиқ-овқат маҳсулотлари ишлатилиши;
- умумий овқатланиш объектлари ошпазларининг кўпчилиги соҳа бўйича ўқимаганлиги, уларнинг таом тайёрлаш технологияларини, озиқ-овқат маҳсулотларини сақлаш, ташиш ва реализация қилиш қоидаларини билмаслиги аниқланган.
Эслатиб ўтамиз, 4 август куни Самарқанд вилояти Ургут туманидаги тўйхоналарнинг бирида 42 киши салатдан заҳарланганди. 22 август куни Самарқанд шаҳрида 49 киши фастфуд марказида ҳот-догдан заҳарлангани тўғрисида хабар берилганди.
Изоҳ (0)