2002–2004-yillar davomida Buyuk Britaniyaning O‘zbekistondagi elchisi sifatida faoliyat olib borgan Kreyg Myurrey Islandiyadan o‘z vataniga qaytishda aeroportda hibsga olindi.
Ma’lum qilinishicha, Myurrey Reykyavikda Julian Assanjni himoya qilish kampaniyasida ishtirok etayogan taniqli shaxslar bilan uchrashgan. 22-oktyabr, yakshanba kuni u Islandiya parlamenti binosi oldida Falastin birdamlik qo‘mitasi tomonidan uyushtirilgan Isroilning G‘azodagi “genotsid urushi”ga qarshi namoyishda qatnashgan.
Myurrey WikiLeaks asoschisi, hozirda Londonning Belmarsh qattiq tartibli qamoqxonasida saqlanayotgan Julian Assanjning ashaddiy tarafdori hisoblanadi. Assanj AQShning Iroq va Afg‘onistondagi harbiy harakatlari bo‘yicha maxfiy hujjatlarni oshkor qilgani uchun AQSH qonuniga binoan u yerga ekstraditsiya qilinishi kutilmoqda. AQSH hukumati tomonidan unga qo‘yilgan ayblovlar 175 yillik qamoq muddatini nazarda tutadi.
Ismi oshkor etilmagan uchta aksilterror xodimi 65 yoshli Myurreyni bir soat davomida so‘roq qilib, uning noutbuki va elektron qurilmalarini tortib olgan.
Myurrey Grayzone veb-saytiga bergan intervyusida u siyosiy qarshlari tufayli so‘roq qilinganini aytdi.
“Ular mendan birinchi navbatda Assanj himoyasi uchun namoyish o‘tkazgan guruh a’zolari bilan shaxsiy uchrashuvim haqida so‘rashdi... Barcha savollar moliyaviy mavzuga doir edi, shu jumladan, men bu guruhdan pul olmoqdamanmi yoki yo‘qmi? Menga Julianning oilasi maosh to‘laydimi? Shu kabi savollar”, — dedi Myurrey.
Myurrey bu savollarning har biriga “yo‘q” deb javob bergan.
Grayzone’ning xabar berishicha, terrorga qarshi kurash xodimlari Myurreyni o‘zining mashhur blogi haqida ham so‘roqqa tutib, yana kim unga kirish yoki post joylashtirish huquqiga egaligini so‘rashgan.
World Socialist veb-sayti “Britaniya hukumati Myurreyni Isroilning G‘azoga hujumiga qarshi chiqqani uchun nishonga oldi”, deb yozdi. “Chunki Isroilning hujumi AQSh va Britaniya hukumatlari tomonidan moliyalashtirilgan”, — deyiladi xabarda.
Myurreydan nima uchun Islandiyadagi Falastin tarafdorlarining norozilik namoyishida qatnashgani va u yerdagilar nima deganini tushuntirishni talab qilishgan. Myurrey esa island tilini bilmasligini ma’lum qilgan.
X ijtimoiy tarmog‘ida Myurrey Isroilning halokatli qamalida imperialistik kuchlarning sherikligini fosh qildi. Yevropa Ittifoqi prezidenti Ursula fon der Lyayenning 13-oktyabr kuni Isroilga tashrifi va u yerda HAMASni terrorchi tashkilot deb qoralagani haqida Myurrey shunday yozgan: “Siz Isroilga genotsidni yashirish va qo‘llab-quvvatlash uchun keldingiz”.
“Men aniq ayta olaman. Men har doim intuitiv ravishda urushga qarshi bo‘lganman. Men hayotimni nizolarni hal qilish va yarashtirishga bag‘ishladim. Ammo G‘azodagi genotsidda men HAMAS va Hizbullohning qurolli qarshilik ko‘rsatishini ma’qullayman. Agar bu jinoyat bo‘lsa, men qamoqqa tushishga tayyorman”, — deb yozgan Kreyg Myurrey.
Izoh (0)