2002–2004 йиллар давомида Буюк Британиянинг Ўзбекистондаги элчиси сифатида фаолият олиб борган Крейг Мюррей Исландиядан ўз ватанига қайтишда аэропортда ҳибсга олинди.
Маълум қилинишича, Мюррей Рейкявикда Жулиан Ассанжни ҳимоя қилиш кампаниясида иштирок этаёган таниқли шахслар билан учрашган. 22 октябрь, якшанба куни у Исландия парламенти биноси олдида Фаластин бирдамлик қўмитаси томонидан уюштирилган Исроилнинг Ғазодаги “геноцид уруши”га қарши намойишда қатнашган.
Мюррей WikiLeaks асосчиси, ҳозирда Лондоннинг Белмарш қаттиқ тартибли қамоқхонасида сақланаётган Жулиан Ассанжнинг ашаддий тарафдори ҳисобланади. Ассанж АҚШнинг Ироқ ва Афғонистондаги ҳарбий ҳаракатлари бўйича махфий ҳужжатларни ошкор қилгани учун АҚШ қонунига биноан у ерга экстрадиция қилиниши кутилмоқда. АҚШ ҳукумати томонидан унга қўйилган айбловлар 175 йиллик қамоқ муддатини назарда тутади.
Исми ошкор этилмаган учта аксилтеррор ходими 65 ёшли Мюррейни бир соат давомида сўроқ қилиб, унинг ноутбуки ва электрон қурилмаларини тортиб олган.
Мюррей Grayzone веб-сайтига берган интервьюсида у сиёсий қаршлари туфайли сўроқ қилинганини айтди.
“Улар мендан биринчи навбатда Ассанж ҳимояси учун намойиш ўтказган гуруҳ аъзолари билан шахсий учрашувим ҳақида сўрашди... Барча саволлар молиявий мавзуга доир эди, шу жумладан, мен бу гуруҳдан пул олмоқдаманми ёки йўқми? Менга Жулианнинг оиласи маош тўлайдими? Шу каби саволлар”, — деди Мюррей.
Мюррей бу саволларнинг ҳар бирига “йўқ” деб жавоб берган.
Grayzone’нинг хабар беришича, террорга қарши кураш ходимлари Мюррейни ўзининг машҳур блоги ҳақида ҳам сўроққа тутиб, яна ким унга кириш ёки пост жойлаштириш ҳуқуқига эгалигини сўрашган.
World Socialist веб-сайти “Британия ҳукумати Мюррейни Исроилнинг Ғазога ҳужумига қарши чиққани учун нишонга олди”, деб ёзди. “Чунки Исроилнинг ҳужуми АҚШ ва Британия ҳукуматлари томонидан молиялаштирилган”, — дейилади хабарда.
Мюррейдан нима учун Исландиядаги Фаластин тарафдорларининг норозилик намойишида қатнашгани ва у ердагилар нима деганини тушунтиришни талаб қилишган. Мюррей эса исланд тилини билмаслигини маълум қилган.
Х ижтимоий тармоғида Мюррей Исроилнинг ҳалокатли қамалида империалистик кучларнинг шериклигини фош қилди. Европа Иттифоқи президенти Урсула фон дер Ляеннинг 13 октябрь куни Исроилга ташрифи ва у ерда ҲАМАСни террорчи ташкилот деб қоралагани ҳақида Мюррей шундай ёзган: “Сиз Исроилга геноцидни яшириш ва қўллаб-қувватлаш учун келдингиз”.
“Мен аниқ айта оламан. Мен ҳар доим интуитив равишда урушга қарши бўлганман. Мен ҳаётимни низоларни ҳал қилиш ва яраштиришга бағишладим. Аммо Ғазодаги геноцидда мен ҲАМАС ва Ҳизбуллоҳнинг қуролли қаршилик кўрсатишини маъқуллайман. Агар бу жиноят бўлса, мен қамоққа тушишга тайёрман”, — деб ёзган Крейг Мюррей.
Изоҳ (0)