Armaniston bosh vaziri Nikol Pashinyan Rossiya bazalarining Armaniston hududida qolayotganidan hech qanday foyda ko‘rmayotganini aytdi. Bu haqda u The Wall Street Journal nashriga bergan intervyusida gapirdi.
“Qorabog‘dagi mojaro Moskva o‘zining ittifoqchilik majburiyatlarini bajara olmasligini ko‘rsatdi”, — dedi Pashinyan. “Bu voqealar bizni mohiyatan xavfsizlik bo‘yicha munosabatlarimizni diversifikatsiya qilishimiz kerak degan qarorga olib keldi va endi shunga harakat qilyapmiz”.
Shu bilan birga, jurnalistning Armaniston Rossiyadan qo‘shinlarini olib chiqib ketishni talab qiladimi, degan savoliga Pashinyan shunday javob berdi:
“Biz bunday savolni muhokama qilmayapmiz. Hozir boshqa masalalarni ko‘proq gaplashyapmiz, bu holatning sababini tushunishga harakat qilyapmiz. Bular, albatta, Armaniston — Rossiya, Armaniston — KXSHT o‘rtasidagi ishchi muzokaralarning kun tartibi bo‘ladi, deb o‘ylayman”.
Rossiya bilan iqtisodiy va harbiy hamkorlikka ega Armaniston Ozarbayjon Qorabog‘ni nazoratiga qaytarganidan keyin yangi hamkorlar qidirmoqda, deb yozadi The Wall Street Journal.
Rossiya prezidenti matbuot kotibi Dmitriy Peskov Pashinyanning so‘zlariga munosabat bildirar ekan, u qanday kontekstda gapirganini tushunish zarurligini aytdi.
“U bu so‘zlarni aytganmi yo‘qmi, agar aytgan bo‘lsa, qayerda, qaysi kontekstda aytganini hali bilmaymiz. Bizda bunday ma’lumotlar yo‘q, Wall Street Journal’ni esa asosiy manba sifatida qabul qilolmaymiz”, — dedi Peskov “Interfaks”ga.
Rossiyaning 102-harbiy bazasi 1995-yildan beri doimiy ravishda Armanistonda joylashib turibdi. U 3 500 ga yaqin harbiy xizmatchidan iborat.
Sentyabr oyi o‘rtalarida Ozarbayjon tan olinmagan Qorabog‘ Respublikasi hududida aksilterror operatsiyasini o‘tkazib, respublika tugatilgan paytda Rossiya mojaroni hal qilishda hech qanday tarzda ishtirok etmadi. Moskva bu Ozarbayjonning ichki ishi ekanligini, chunki janglar bu davlatning xalqaro miqyosda tan olingan hududida olib borilayotganini bildirdi.
Izoh (0)