Qarshi shahrida Shavkat Mirziyoyev raisligida Qashqadaryo viloyatini ijtimoiy-iqtisodiy rivojlantirish masalalari yuzasidan yig‘ilish bo‘lib o‘tmoqda. Bu haqda prezident matbuot kotibi Sherzod Asadov ma’lum qildi.
Davlat rahbari dunyodagi vaziyat va ziddiyatlar tobora kuchayib borayotgani, bunday sharoitda befarq bo‘lib, kun o‘tsa bo‘ldi, qabilida ish tutadigan rahbarlar eng katta dushman ekanini qayd etdi.
“Mamlakatimiz, xalqimiz tinchligi, farovonligi va kelajagi uchun yangi korxonalar, ish o‘rinlari, yangi bozorlar, investitsiya, katta-katta tushumlar kerak”, — dedi prezident.
Hokim va vazirlar asosiy hamkor davlatlar bozoridagi tebranishlar, savdo cheklovlari davom etaversa, mahsulotlarni qayerga va qanday sotish kerak, qaysi korxonaga qanday ko‘mak berish zarur, degan masalalar ustida bosh qotirishi shartligi ko‘rsatib o‘tildi.
Shavkat Mirziyoyev 24-oktyabrdan beri hududlar rivoji, aholi turmushi bilan tanishish maqsadida Qashqadaryo viloyatida bo‘lib turibdi. Tashrif davomida davlat rahbari Qarshidagi maktabni ham rejalashtirilmagan holda borib ko‘rdi, Qarshi tumani tibbiyot birlashmasiga borib, bemorlar bilan suhbatlashdi.
Izoh (0)