Turoperatorlar “O‘zbekiston temir yo‘llari” rahbariyatiga “1 ta pasport — 1 ta chipta” tizimidan shikoyat qildi

“O‘zbekiston temir yo‘llari” AJ ishchi guruhi va O‘zbekistonning yetakchi turoperatorlari vakillari o‘rtasida uchrashuv bo‘lib o‘tdi. Bu haqda aksiyadorlik jamiyati matbuot xizmati xabar berdi.

Qayd etilishicha, uchrashuv O‘zbekistonning sayyohlik salohiyatini, shuningdek, turoperatorlar o‘z xizmatlarini ko‘rsatishda duch kelayotgan temiryo‘l transporti sohasidagi muammolarni muhokama qilish va rivojlantirishga bag‘ishlandi.

“O‘zbekiston temir yo‘llari”ning birinchi o‘rinbosari ishtirok etgan yig‘ilishda turoperatorlar xizmatlar ko‘rsatishda duch keladigan muammolarini bildirgan.

“Aytib o‘tilgan asosiy masalalardan biri poyezd chiptalari taqchilligiga qarshi kurashish maqsadida yaqinda joriy etilgan “1 ta pasport – 1 chipta” tizimidir. Endi boshqa mijozlar shaxsiy sabablarga ko‘ra sayohatni bekor qilsa, turoperatorlar boshqa yo‘lovchilar uchun chiptalarni qayta rasmiylashtira olmaydi”, — deyiladi xabarda.

Ilgari turoperatorlar bitta pasport uchun sotib olingan barcha chiptalarni sayyohlarning yakuniy ro‘yxatiga muvofiq qayta rasmiylashtirishi mumkin edi. Biroq yangi qoidalar bunga yo‘l qo‘ymaydi. Mutaxassislarning ta’kidlashicha, chiptalarni sotishning belgilangan qoidalariga ko‘ra, faqat alohida hollarda chiptani boshqa shaxsga qayta rasmiylashtirish mumkin, lekin guruhlar uchun emas.

Shuningdek, erta bron qilish muammosi ham muhokama qilingan. Ko‘pgina sayyohlar o‘z sayohatlarini chiptalar sotuvga chiqarilishidan ancha oldin rejalashtiradi (chiptalar jo‘nash kunidan 45 kun oldin sotiladi), bu esa turoperatorlar uchun qiyinchiliklar tug‘diradi.

Shuningdek, turizmni rivojlantirishda muhim o‘rin tutadigan temir yo‘l infratuzilmasini rivojlantirish masalalari muhokamasi ham uchrashuvning asosiy mavzularidan biri bo‘lgan. “O‘zbekiston temir yo‘llari” aksiyadorlik jamiyati rahbariyati temir yo‘l tarmog‘ini modernizatsiya qilish va kengaytirish, shuningdek, qatnov sifati va qulayligini oshirish maqsadida yangi poyezdlarni xarid qilish va joriy etish bo‘yicha o‘z rejalari bilan tanishtirgan.

Eslatib o‘tamiz, sentyabr oxirlarida prezident Shavkat Mirziyoyev huzurida temiryo‘l sohasida hal qilinishi lozim bo‘lgan asosiy masalalar yuzasidan yig‘ilish o‘tkazilgandi. O‘shanda “O‘zbekiston temir yo‘llari” xoldingga aylantirilishi, shuningdek, “O‘zbekiston temir yo‘llari”ning nosohaviy aktivlarini sotish vazifasi qo‘yilgani to‘g‘risida xabar berilgandi.