Xalqaro taraqqiyot agentligi (USAID) administratori Samanta Pauer O‘zbekiston xalqini qo‘llab-quvvatlash uchun 14 million dollardan ortiq mablag‘ ajratilishini eʼlon qildi. Bu haqda AQSHning mamlakatdagi elchixonasi xabar berdi.
Ushbu qo‘shimcha yordam vositasida Qo‘shma Shtatlar USAID orqali quyidagi sohalarda hamkorlik qiladi:
Silga qarshi kurash
O‘zbekiston dori-darmonga chidamli sil kasalligining yuqori darajadaligi bilan kurashib kelmoqda. USAID besh yillik tashabbus sanalgan “Sildan xoli O‘zbekiston” dasturini ishga tushirib, u orqali keng qamrovli qo‘llab-quvvatlash xizmatlarini taqdim etish va mamlakat bo‘ylab silga qarshi asosiy xizmatlardan foydalanish imkoniyatini oshirish maqsadida qo‘shimcha 3,2 million dollar sarmoya kiritadi.
“Sildan xoli O‘zbekiston” dasturi kasallik yuqishining oldini olish va aniqlash, davolashni boshlash, sil kasalligining stigmasini kamaytirish, shuningdek, axborot tizimlari va moliyalashtirishni takomillashtirish bo‘yicha O‘zbekistonda sog‘liqni saqlash sohasida olib borilayotgan islohotlarni ilgari surishda yordam beradi. 2002-yildan beri USAID O‘zbekistonning silga qarshi kurashdagi saʼy-harakatlarini qo‘llab-quvvatlash uchun qariyb 60 million dollar sarmoya kiritgan.
Epidemiya va pandemiya tahdidlariga qarshi kurash
USAID global sog‘liqni saqlash xavfsizligini mustahkamlashda O‘zbekiston hukumati bilan hamkorlik qiladi. 4 million dollarlik sarmoya O‘zbekistonning kelajakdagi tahdidlar, epidemiyalar va pandemiyalarga chidamliligini oshirish uchun eng yaxshi tajriba va COVID-19 chora-tadbirlaridan olingan saboqlarga yo‘naltiriladi. Shuningdek, ushbu mablag‘ O‘zbekistonga laboratoriya va kuzatuv tizimlarini favqulodda vaziyatlarga tayyorgarligini, xavf-xatarlar chog‘ida aloqa bog‘lash va jamoatchilik bilan hamkorlikni kuchaytirish imkonini beradi.
Biznes va xususiy sektorni mustahkamlash
USAID turizm, axborot-kommunikatsiya texnologiyalari va yashil iqtisodiyot kabi maqsadli tarmoqlar yordamida O‘zbekiston iqtisodiyotini mustahkamlash uchun 3,5 million dollar sarmoya kiritadi. Ushbu dastur ish o‘rinlari yaratish, iqtisodiy inklyuzivlikni yaxshilash, kichik va o‘rta korxonalar uchun eksport bozorlarini rivojlantirish va kapitalni jalb qilish imkonini beradi.
USAID ayollar, yoshlar va imkoniyati cheklanganlar uchun o‘z biznesini ochish va faoliyat yuritishini qiyinlashtiradigan siyosiy va iqtisodiy to‘siqlarni bartaraf etish bo‘yicha ish olib boradi. Bundan tashqari, USAID O‘zbekiston biznes korxonalariga elektron tijorat va savdoni rivojlantirish imkonini beruvchi AQSH texnologiyalarini joriy etishda ko‘maklashadi.
Yanada masʼuliyatli va samarali mahalliy boshqaruv
O‘zbekistonning 2030-yilgacha bo‘lgan strategiyasini qo‘llab-quvvatlagan holda hamda Kongress bilan hamkorlikda USAID yangi mahalliy boshqaruv dasturi orqali O‘zbekistonda viloyat va mahalliy boshqaruvni kuchaytirish uchun 3,5 million dollar miqdorida mablag‘ ajratadi. Bu orqali USAID viloyat va mahalliy hokimiyatlar yanada eʼtiborli, xalq bilan birgalikda ishlovchi va masʼuliyatli bo‘lishi hamda o‘zbek xalqiga davlat xizmatlarini yaxshiroq ko‘rsatish imkoniyatiga ega bo‘lishini ko‘zlaydi.
Ushbu tashabbus doirasida milliy va mahalliy hukumatlar, fuqarolik jamiyati va xususiy sektor bilan birgalikda mahalliy davlat hokimiyati organlarining budjetlari va xarajatlarida shaffoflikni oshirish, davlat amaldorlarini yangi majburiyatlarni bajarishga o‘rgatish, fuqarolar va jamoalarni mahalliy hukumatlar faoliyatini nazorat qilishlari va o‘z ehtiyojlarini qondiradigan davlat xizmatlarini targ‘ib qilishlari uchun zarur bo‘lgan vositalar, ko‘nikma va resurslar bilan taʼminlash maqsad qilinadi. USAID, shuningdek, desentralizatsiya va mahalliy boshqaruv bo‘yicha maʼlumotlarga asoslangan milliy siyosat va qonunchilikni ishlab chiqishda hukumatni qo‘llab-quvvatlaydi.
Shavkat Mirziyoyev 23-oktyabr kuni AQSH Xalqaro taraqqiyot agentligi (USAID) administratori Samanta Pauyer boshchiligidagi delegatsiyani qabul qilgani to‘g‘risida xabar berilgandi. Konstruktiv va o‘zaro manfaatli hamkorlikni yanada rivojlantirish masalalari ko‘rib chiqilgan.
Izoh (0)