Davlat aktivlarini boshqarish agentligi “O‘ztemiryo‘lkonteyner” ustav kapitalidagi 35 foiz davlat ulushini xususiylashtirish jarayonlari to‘xtatilganini maʼlum qildi.
Qayd etilishicha, temiryo‘l transporti sohasining biznes jarayonlarini raqamlashtirish, boshqaruvning zamonaviy usullarini joriy etish va respublikaning tranzit salohiyatidan samarali foydalanish, yuk tashishda tannarx va xarajatlarni kamaytirish maqsadida “O‘zbekiston temir yo‘llari” va uning tizim korxonalari isloh qilinmoqda. Ushbu jarayonda “O‘ztemiryo‘lkonteyner” “Temiryo‘lkargo” AJ sifatida qayta tashkil etilmoqda.
Shunga ko‘ra, “O‘ztemiryo‘lkonteyner” ustav kapitalidagi 35 foiz davlat ulushini xususiylashtirish jarayonlari to‘xtatilgan.
“Ushbu sotish jarayoni bo‘yicha avvalgi chop etilgan eʼlonlarda Davaktiv agentligi va uning maslahatchisi sotish jarayonining muddatiga o‘zgartirish kiritish hamda to‘xtatish huquqini o‘zida saqlab qolishi qayd etilganligi eslatib o‘tiladi”, — deyiladi xabarda.
“O‘ztemiryo‘lkonteyner” “O‘zbekiston temir yo‘llari” konteyner parkining operatori bo‘lgan holda mamlakat hududi orqali konteyner tashishni tashkil etish bo‘yicha xizmatlarning to‘liq to‘plamini taqdim etadi.
- “O‘ztemiryo‘lkonteyner” funksiyalariga O‘zbekiston temiryo‘llarining konteyner parkini boshqarish, jumladan, ichki va xalqaro tashishlarda konteynerlarda yuk tashishni rejalashtirish masalalari kiradi.
- Kompaniya 2002-yilda tashkil etilgan.
- Bugungi kunga qadar “O‘ztemiryo‘lkonteyner” tizimida respublika bo‘ylab 20 dan ortiq logistika markazlari mavjud.
Eslatib o‘tamiz, sentyabr oxirlarida prezident Shavkat Mirziyoyev huzurida temiryo‘l sohasida hal qilinishi lozim bo‘lgan asosiy masalalar yuzasidan yig‘ilish o‘tkazilgandi. O‘shanda “O‘zbekiston temir yo‘llari” xoldingga aylantirilishi, shuningdek, “O‘zbekiston temir yo‘llari”ning nosohaviy aktivlarini sotish vazifasi qo‘yilgani to‘g‘risida xabar berilgandi.
Izoh (0)